ភ្នំពេញ៖ សម្តេចធិបតី ហ៊ុន ម៉ាណែត បញ្ជាក់ប្រាប់មហាជនថា រាជរដ្ឋាភិបាល មិនមានដាក់បទបញ្ជាឱ្យដកថយកម្លាំងកងទ័ព ក្រោយពីមានបទឈប់បាញ់នោះទេ ហើយក្នុងកិច្ចចរចាបទឈប់បាញ់ ក៏គ្មានដាក់លក្ខខណ្ឌឱ្យកងទ័ពភាគីណាដកថយពីទីតាំងឈរជើងរបស់ខ្លួននោះដែរទេ។

ការបកស្រាយរបស់សម្តេចធិបតីនាយករដ្ឋមន្រ្តី នាថ្ងៃទី៩ ខែកញ្ញា ឆ្នាំ២០២៥ ខាងលើនេះ ធ្វើឡើងក្រោយសម្តេច ឃើញមានការជជែកគ្នាក្នុងបណ្ដាញសង្គមលើប្រធានបទមួយចំនួន រួមទាំងការចោទជាសំណួរផ្សេងៗ ដែលបង្កើតជាភាពស្រពេចស្រពិល រហូតដល់មានបុគ្គលខ្លះយកទៅធ្វើអាជីវកម្មដើម្បីកេងចំណេញនយោបាយ។

ក្នុងស្ថានការណ៍នេះ សម្តេចធិបតី ហ៊ុន ម៉ាណែត ក៏បានអំពាវនាវឱ្យពលរដ្ឋទាំងអស់ ទុកចិត្តលើរាជរដ្ឋាភិបាលដែលបាន និងកំពុងធ្វើកិច្ចការងារយ៉ាងសកម្ម ក្នុងការស្វែងរកដំណោះស្រាយបញ្ចប់បញ្ហាឱ្យបានឆាប់រហ័ស ដើម្បីឧត្តមប្រយោជន៍របស់ជាតិ និងប្រជាជន បើទោះជាកិច្ចការជាច្រើនមិនត្រូវបានផ្សព្វផ្សាយជាសាធារណៈ ដែលមើលទៅហាក់ដូចជាមានភាពស្ងាត់ស្ងៀមពេកក៏ដោយ៕