ភ្នំពេញ៖ លោកស្រី Rebecca Hunter នាយកទីផ្សារ នៃក្រុមហ៊ុន Starlink សហរដ្ឋអាម៉េរិក បង្ហាញគោលបំណង ក្នុងការពិនិត្យលទ្ធភាពចូលរួមគាំទ្រលើការភ្ជាប់គម្លាតនៃការតភ្ជាប់ telemedicine e-health និងគាំទ្រសេវាសុខភាពចល័តក្នុងប្រទេសកម្ពុជា។ នេះបើតាមការចុះផ្សាយរបស់ក្រសួងសុខាភិបាល កាលពីថ្ងៃទី០៤ ខែកញ្ញា ឆ្នាំ២០២៥។

ឯកឧត្ដមសាស្រ្ដាចារ្យ ឈាង រ៉ា រដ្ឋមន្រ្ដីក្រសួងសុខាភិបាល បានស្វាគមន៍គំនិតផ្តួចផ្តើមដើម្បីស្វែងយល់ពីរបៀបដែលភាពជាដៃគូនេះអាចពង្រឹងការតភ្ជាប់ ពង្រឹងការផ្តល់សេវាថែទាំសុខភាព និងធ្វើឱ្យប្រសើរឡើងនូវភាពធន់នៅក្នុងប្រទេសកម្ពុជា ដែលទីបំផុតផ្តល់អត្ថប្រយោជន៍ដល់សុខភាព និងសុខុមាលភាពរបស់ប្រជាជនកម្ពុជាទាំងអស់។

គួរបញ្ជាក់ថា ជំនួបនេះ ធ្វើឡើងក្នុងគោលបំណងពិភាក្សាលើការសហការ និងការគាំទ្រសក្ដានុពលនៃការអភិវឌ្ឍន៍ បច្ចេកវិទ្យាតភ្ជាប់ (Connectivity) ឌីជីថល ក្នុងការ ការផ្តល់សេវាសំខាន់ៗ នៅក្នុងវិស័យសុខាភិបាលកម្ពុជា៕