ភ្នំពេញ៖ ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ បានលើកឡើងថា បច្ចុប្បន្ននេះនៅតាមបណ្ដាលរោងចក្រ សហគ្រាសនៅក្នុងខេត្តតាកែវ ទាំងមូលកំពុងតែត្រូវការកម្លាំងពលកម្មប្រមាណជាង១ម៉ឺនកន្លែង ដូច្នេះពលករ ទើបត្រលប់មកពីប្រទេសថៃ ចង់ធ្វើការអាចមកទំនាក់ទំនងនៅមន្ទីរការងារ ឬតាមសាលាក្រុងស្រុកបាន។

ក្នុងឱកាសអញ្ជើញចែកអំណោយដល់បងប្អូនប្រជាពលរដ្ឋ ជាង២០០គ្រួសារ នៅក្នុងស្រុកអង្គបូរី ឯកឧត្តម វ៉ី សំណាង បានលើកឡើងថា៖ «បើប្រជាពលរដ្ឋគ្មានជំនាញ យើងមានសាលាបង្រៀនជំនាញដល់បងប្អូនហើយ បើបងប្អូនមានជំនាញហើយតែគ្មានសញ្ញាប័ត្របញ្ជាក់ សូមបងប្អូន មកកាន់វិទ្យាស្ថានបណ្ដុះបណ្ដាលភូមិភាគតេជោ យើងនឹងរៀបចំចេញសញ្ញាប័ត្រ ជូនបងប្អូនតាមរយៈការធ្វើប្រឡង ធ្វើតេស្តសមត្ថភាពបងប្អូនតែប៉ុណ្ណោះ»។

ឯកឧត្តម វ៉ី សំណាង បានបន្ថែមបន្តថា សម្រាប់ខេត្តតាកែវមានប្រជាពលរដ្ឋរាប់ពាន់នាក់ បានវិលត្រលប់ ពីប្រទេសថៃចូលមកកាន់ខេត្តតាកែវវិញ បញ្ហានេះអាជ្ញាធរបានយកចិត្តទុកដាក់ខ្ពស់ទៅលើជីវភាពប្រចាំថ្ងៃរបស់ពួកគាត់ ដោយយើងបានបង្កើតក្រុមការងារ ដើម្បីស្វែងរកការងារជូនបងប្អូនធ្វើដើម្បីដោះស្រាយជីវភាពប្រចាំថ្ងៃ៕