ភ្នំពេញ៖ រដ្ឋាភិបាលចក្រភពអង់គ្លេស នឹងផ្ដល់មូលនិធិថ្មីចំនួន ៣,៨លានដុល្លារ តាមរយៈអង្គការនាំមុខគេរបស់ចក្រភពអង់គ្លេសគឺ អង្គការ Mines Advisory Group (MAG) និង The HALO Trust (HALO) ដើម្បីជួយបោសសម្អាតមីន និងអប់រំសហគមន៍អំពីហានិភ័យមីននៅកម្ពុជា។ នេះបើតាមការចុះផ្សាយរបស់ស្ថានទូតអង់គ្លេសប្រចាំកម្ពុជា កាលពី២០ ខែកម្ភៈ ឆ្នាំ២០២៤។

អង្គការ MAG និង HALO រំពឹងថា ការផ្តល់មូលនិធិរបស់ចក្រភពអង់គ្លេស នឹងជួយរំដោះដីសម្រាប់កសិកម្ម លំនៅឋាន និងសេវាកម្មសង្គមមូលដ្ឋានដូចជា សាលារៀន មន្ទីរពេទ្យ ទឹកស្អាត និងអនាម័យ។ ដូច្នេះហើយ មូលនិធិនេះ នឹងជួយគាំទ្រនិងជំរុញការអភិវឌ្ឍសេដ្ឋកិច្ច ក្នុងសហគមន៍ជុំវិញពិភពលោក រួមទាំងស្តារជីវភាពរស់នៅរបស់ប្រជាជនក្នុងតំបន់ជនបទ និងតំបន់ដែលខ្វះខាត ព្រមទាំងពង្រឹងផលិតកម្មក្នុងស្រុក និងសន្តិសុខស្បៀងអាហារ។

អង្គការ MAG និង HALO នឹងចាត់ចែងផ្តល់មូលនិធិនេះ ជាមួយនឹងវគ្គអប់រំដោយផ្ទាល់អំពីហានិភ័យនៃគ្រាប់រំសេវផ្ទុះដល់មនុស្សជាងកន្លះលាននាក់ ដោយរំពឹងថា នឹងមានការចូលរួមពីមនុស្សជាង ៣៤ ០០០នាក់ ដែលនឹងធ្វើឱ្យការយល់ដឹងអំពីហានិភ័យ និងសុវត្ថិភាពសហគមន៍នៅទូទាំងប្រទេសឱ្យមានការប្រសើរឡើងខ្លាំងជាងមុន។

លោក Dominic Williams ឯកអគ្គរាជទូតអង់គ្លេសប្រចាំកម្ពុជា បានថ្លែងថា៖«ខ្ញុំរីករាយដែលចក្រភពអង់គ្លេស នឹងផ្តល់មូលនិធិបន្ថែមគាំទ្ររដ្ឋាភិបាលកម្ពុជា សម្រាប់ប្រទេសកម្ពុជាគ្មានមីននៅឆ្នាំ២០២៥។ រយៈពេលជាង ៣០ឆ្នាំមកហើយ ការផ្តល់មូលនិធិរបស់ចក្រភពអង់គ្លេស បានគាំទ្រដល់កិច្ចខិតខំប្រឹងប្រែងជាវីរភាពនៃអ្នកដោះមីនកម្ពុជា និងអន្តរជាតិក្នុងការបោសសម្អាតមីន សម្រាប់ការប្រើប្រាស់ដីប្រកបដោយផលិតភាព ការពារសហគមន៍ និងជួយសង្គ្រោះជីវិតបុគ្គល»។

គួរជម្រាបថា រដ្ឋាភិបាលចក្រភពអង់គ្លេស បានផ្តល់មូលនិធិថ្មីតាមរយៈអង្គការ MAG និងHALO សរុបចំនួនជាង ២១លានដុល្លារ ដើម្បីជួយបោសសម្អាតមីន និងអប់រំសហគមន៍ពីហានិភ័យអំពីមីននៅប្រទេសចំនួន៨ នៅទ្វីបអាហ្វ្រិកនិងអាស៊ី ក្នុងនោះកម្ពុជាទទួលបាន ៣,៨លានដុល្លារ។ ការផ្តល់មូលនិធិនេះ នឹងបង្កើតឱកាសដល់ស្ត្រីនៅក្នុងប្រទេសអង់ហ្គោឡា កម្ពុជា និងឡាវ តាមរយៈការបង្កើនការងារ និងការអភិវឌ្ឍអាជីពក្នុងការដោះមីន ជាមួយនឹងការវិនិយោគជាបន្តបន្ទាប់ ក្នុងការបណ្តុះបណ្តាលបុគ្គលិក៕