ភ្នំពេញ៖ «ថៃលើកដុំថ្មទម្លាក់លើជើងខ្លួនឯង»។ សម្តេចតេជោ ហ៊ុន សែន លើកឡើងដូច្នេះ ក្រោយអាជ្ញាធរ និងប៉ូលិសថៃ កំទេចបទល្មើសអនឡាញ លើទឹកដីថៃ ដែលជាការរួមចំណែកកាត់បន្ថយបទល្មើសអនឡាញហូរចូលទឹកដីកម្ពុជា ដែលបទល្មើសទាំងនោះ នៅពាសពេញទឹកដីថៃ។

សម្តេចតេជោ ហ៊ុន សែន មានប្រសាសន៍បន្តថា ការបំផ្លាញសំបុកបទល្មើសអនឡាញនេះ គួរណាស់ធ្វើយូរហើយ មិនមែនទុករហូតដល់ពេលនេះទើបធ្វើនោះទេ ព្រោះកន្លងមក វាបានបង្កជាបញ្ហាយ៉ាងច្រើនដល់កម្ពុជា ដូចជាលំហូបទល្មើស ដែលកើតចេញពីទឹកដីថៃ ជាពិសេសនៅព្រំដែនរបស់ថៃតែម្តង។

អាជ្ញាធរ សារព័ត៌មាន និងមហាជនថៃ និយាយថា ការបង្រ្កាប និងស៊ើបអង្កេតលើ លោក កុក អាន គឺដោយសារជាមនុស្សជិតស្និទ្ធជាមួយ ហ៊ុន សែន។ ពាក់ព័ន្ធនឹងករណីនេះ សម្តេចតេជោ ហ៊ុន សែន លើកឡើងថា ដូច្នេះតុលាការ គួរបើកការស៊ើបអង្កេតលើលោក ថាក់ស៊ីន ដែរ ព្រោះអ្នកណាៗក៏ដឹងដែរថា ថាក់ ស៊ីន គឺជាមនុស្សស្និទ្ធបំផុតជាមួយខ្ញុំ ជិតស្និទ្ធរហូតមានបន្ទប់ដេកនៅផ្ទះរបស់ខ្ញុំទៀតផង។ សម្តេចតេជោ ហ៊ុន សែន ក៏បានចោទសួរទៅតុលាការថៃថា៖ «តើហ៊ានបើកការស៊ើបអង្កេតលើ ថាក់ ស៊ីន ទេ?»៕