ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ ចុះអនុស្សរណៈនៃការយោគយល់គ្នា (MOU) ជាមួយមជ្ឈមណ្ឌលរោគវិនិច្ឆ័យ ប៊ីយ៉ូម៉េឌីក (Biomedic Diagnostic Center) ស្តីពី ការផ្តល់សេវាកម្មរបស់មជ្ឈមណ្ឌលរោគវិនិច្ឆ័យ ប៊ីយ៉ូម៉េឌីក នៅក្រសួងកសិកម្ម ដោយមានសមាភាពចូលរួមសរុបប្រមាណ ១២០នាក់។

ការចុះអនុស្សរណៈនៃការយោគយល់គ្នានេះ រៀបចំឡើងក្នុងបំណងចូលរួមចំណែកក្នុងកិច្ចសហការ ដើម្បីលើកកម្ពស់ការពិនិត្យសេវាសុខភាពគ្រប់មុខតាមរយៈការផ្តល់សេវាកម្មកញ្ចប់បញ្ចុះតម្លៃដែលផ្តល់ដោយមជ្ឈមណ្ឌលរោគវិនិច្ឆ័យ ប៊ីយ៉ូម៉េឌីក។

ការចុះ MoU នេះ ជួយសម្រួលបន្ទុកចំណាយដល់ថ្នាក់ដឹកនាំ មន្ត្រីរាជការ នៅក្នុងក្រសួងកសិកម្ម រុក្ខាប្រមាញ់ និងនេសាទ ផ្នែករូបភាពវេជ្ជសាស្ត្រ និងមន្ទីរពិសោធន៍វិភាគវេជ្ជសាស្ត្រ ដែលធ្វើរោគវិនិច្ឆ័យប្រកបដោយស្តង់ដាគុណភាពខ្ពស់ ប្រសិទ្ធភាព និងសុវត្ថិភាព ដើម្បីរួមចំណែកកាត់បន្ថយដល់ការចំណាយថ្លៃសេវាពិនិត្យសុខភាពរបស់ថ្នាក់ដឹកនាំមន្ត្រីរាជការ ទីប្រឹក្សា ជំនួយការ និងមន្ត្រីជាប់កិច្ចសន្យារបស់ក្រសួងកសិកម្ម និងគ្រួសាររបស់មន្ត្រីក្រសួងកសិកម្ម៕