ភ្នំពេញ៖ ក្រសួងទេសចរណ៍ និងស្ថានទូតហ្វីលីពីនប្រចាំកម្ពុជា សហការរៀបចំការប្រគំតន្រ្តី ដោយក្រុមតន្រ្តីដ៏ល្បីពីរដ្ឋធានីម៉ានីល ឈ្មោះ Manila Symphony Junior Orchestra (MSJO) ពីប្រទេសហ្វីលីពីន នៅព្រះលានជល់ដំរី ខេត្តសៀមរាប ដើម្បីផ្សព្វផ្សាយពីសក្តានុពលទេសចរណ៍កម្ពុជា ជាពិសេសទេសភាពដ៏ស្រស់ស្អាតនារដូវកាលបៃតង (Green Season) របស់កម្ពុជា ដល់ប្រជាពលរដ្ឋហ្វីលីពីន។

ព្រឹត្តិការណ៍ ដែលនឹងរៀបចំឡើង នៅថ្ងៃទី១២ ខែមិថុនា ឆ្នាំ២០២៥ ចាប់ពីម៉ោង ៨ព្រឹក ដល់ម៉ោង១២ថ្ងៃត្រង់នេះ ក៏នឹងក្លាយជាវេទិកា ដើម្បីបង្ហាញនូវវប្បធម៌តន្រ្តីរបស់ហ្វីលីពីនដល់ប្រជាជនកម្ពុជា និងភ្ញៀវទេសចរអន្តរជាតិ ដែលកំពុងទស្សនានៅខេត្តសៀមរាបផងដែរ។

ការប្រគំតន្រ្តីខាងលើ ត្រូវបានឯកភាព ក្នុងឱកាស ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ចូលរួមក្នុងពិធីជប់លៀងអបអរខួបអនុស្សាវរីយ៍ លើកទី៦៨ឆ្នាំ នៃទំនាក់ទំនងការទូតរវាងកម្ពុជា និងហ្វីលីពីន ព្រមទាំងខួបលើកទី ១២៧ឆ្នាំ នៃទិវាប្រកាសឯករាជ្យជាតិហ្វីលីពីន (ASEAN Tourism Forum 2025: Unity in Motion, Shaping ASEAN Tourism Tomorrow) នៅសណ្ឋាគារ Shangri-La Phnom Penh រាជធានីភ្នំពេញ កាលពីថ្ងៃទី១០ ខែមិថុនា ឆ្នាំ២០២៥៕