ភ្នំពេញ៖ កម្ពុជា ពុំមានការដកកងទ័ពចេញពីតំបន់ស្ថិតក្នុងដែនអធិបតេយ្យភាព ដែលកងទ័ពកម្ពុជា បានឈរជើងកាន់កាប់ជាយូរមកហើយនោះទេ ហើយរាល់ការរៀបចំកម្លាំងកងទ័ព ការឈរជើង ការពង្រាយកម្លាំង ការកែសម្រួលកម្លាំង ការចល័តកម្លាំង គឺស្ថិតនៅក្នុងដែនអធិបតេយ្យភាពរបស់កម្ពុជា ដើម្បីត្រៀមខ្លួនការពារបូរណភាពទឹកដី។ នេះបើតាមសេចក្តីប្រកាសព័ត៌មានរបស់ ក្រសួងការពារជាតិ នាថ្ងៃទី៩ ខែមិថុនា ឆ្នាំ២០២៥។

សេចក្តីប្រកាសព័ត៌មានដដែល បញ្ជាក់ថា កងទ័ពកម្ពុជា គាំទ្រដល់ការខិតខំស្វែងរកដំណោះស្រាយបញ្ហាដោយសន្តិវិធី ប៉ុន្តែត្រៀមខ្លួនជាស្រេច ដើម្បីអនុវត្តបទបញ្ជារបស់រាជរដ្ឋាភិបាល ក្នុងការការពារបូរណភាពទឹកដី ប្រឆាំងរាល់ការប៉ុនប៉ងឈ្លានពាននានា។ កងទ័ពកម្ពុជា ក៏ត្រៀមខ្លួនជាស្រេចក្នុងការចូលរួមគាំទ្រ ដល់យន្តការចរចាព្រំដែនជាមួយប្រទេសថៃ ជាពិសេសគណៈកម្មការព្រំដែនចម្រុះ (JBC) ដើម្បីបន្តកិច្ចការវាស់វែងខ័ណ្ឌសីមា និងបោះបង្គោលព្រំដែនរវាង ប្រទេសទាំងពីរ ដែលនៅសេសសល់ ក្រៅពីចំណុចដែលកម្ពុជា នឹងដាក់ទៅតុលាការយុត្តិធម៌អន្តរជាតិ (ICJ)។

ពាក់ព័ន្ធនឹងករណីនេះ ក្រសួងការពារជាតិ បានអំពាវនាវដល់ប្រជាពលរដ្ឋទាំងអស់ តាមដានព័ត៌មានព័ត៌មាន ដែលមានប្រភពច្បាស់លាស់ ជាពិសេសព័ត៌មានផ្លូវការ ចេញពីរាជរដ្ឋាភិបាលកម្ពុជា និងក្រសួងការពារជាតិ ដែលជាប្រភពព័ត៌មានមានភាពត្រឹមត្រូវ ពិតប្រាកដ និងអាចជឿទុកចិត្តបាន៕