ភ្នំពេញ៖ «វិធីសាស្រ្ត 5Cs» ក្នុងការវិភាគប្រតិបត្តិការអាជីវកម្ម គឺជាយុទ្ធសាស្រ្តមួយដែលផ្ដោតលើការសិក្សាប្រតិបត្តិការទាំងផ្នែកខាងក្នុងក្រុមហ៊ុន និងបរិយាកាសខាងក្រៅ ដើម្បីប៉ាន់ស្មានដឹង និងគ្រប់គ្រងដំណើរការបានល្អ ក្នុងការប្រើប្រាស់ហិរញ្ញាវត្ថុ ផែនការសកម្មភាព ប្រតិបត្តិការការងារ និងការប្រកួតប្រជែងក្នុងទីផ្សារ ឱ្យមានប្រសិទ្ធភាព។

សហគ្រិនខ្មែរ បានបង្ហាញចំណុចសំខាន់ៗចំនួន៥ ដែលការវិភាគ 5Cs ផ្តោតសំខាន់ រួមមានទី១. ក្រុមហ៊ុន (Company)៖ ចំណុចនេះ ផ្ដោតខ្លាំងចំពោះការវិភាគលើប្រតិបត្តិការខាងក្នុងក្រុមហ៊ុន ការគ្រប់គ្រងបុគ្គលិក និងលំហូរសាច់ប្រាក់ ដែលពាក់ព័ន្ធនឹងសមត្ថភាពពង្រីកសកម្មភាព និងតាមទាន់ការវិវឌ្ឍនៃទីផ្សារ។ ជាមួយគ្នានោះ គុណភាពផលិតផល និងកេរ្តិ៍ឈ្មោះក្រុមហ៊ុន ក៏ជាផ្នែកសំខាន់ក្នុងការវិភាគឱ្យដឹងថា វាមានឥទ្ធិពល ឬលទ្ធផលបែបណាលើទីផ្សារ។

ទី២. ការសហការ (Collaboration)៖ ការសហការជាមួយដៃគូផ្សេងទៀត ជាវិធីសាស្រ្ដមួយជួយឱ្យអាជីវកម្មដំណើរការល្អ ប្រសិនបើសេវាកម្មរបស់ដៃគូសហការមានដំណើរការល្អ។ ចំណុចដែលត្រូវពិនិត្យមើលឱ្យបានហ្មត់ចត់ រួមមានប្រតិបត្តិការការងាររបស់ដៃគូ ការគោរពពេលវេលា និងសេវាកម្មជូនអតិថិជន។ ប្រសិនបើសហការត្រូវស្ថាប័ន អាជីវកម្មរបស់អ្នកក៏មានភាពរលូនដែរ។ ទី៣. អតិថិជន (Customers)៖ វិភាគជាចម្បងលើសកម្មភាព ទម្លាប់ និងទំនោររបស់អតិថិជនលើផលិតផល ឬសេវាកម្មនីមួយៗ តាមរយៈការប្រមូលទិន្នន័យបទពិសោធប្រើប្រាស់ផ្ទាល់ ដើម្បីដឹងថាអតិថិជនមានទស្សនៈបែបណា ឬចង់បានអ្វីពីផលិតផល ឬសេវាកម្មនោះ។

ទី៤. ដៃគូប្រកួតប្រជែង (Competitor)៖ ចាប់ផ្ដើមកំណត់សម្គាល់ពីដៃគូប្រកួតប្រជែង ដោយសិក្សាពីចំណុចខ្លាំងនៃក្រុមមានឥទ្ធិពលខ្លាំងក្នុងទីផ្សារ ឈ្វេងយល់ពីយុទ្ធសាស្រ្ត និងសកម្មភាពនៃការវាយលុយទីផ្សាររបស់ពួកគេ វិភាគលើចំណុចខ្សោយ ឬផ្នែកខ្វះចន្លោះណាមួយ តាមរយៈបទពិសោធកន្លងមក។ ទិន្នន័យទាំងនោះ អាចជាផ្នែកមួយជួយវិភាគឱ្យគ្រប់ជ្រុងជ្រោយ។ ទី៥. បរិបទ (Context)៖ ផ្នែកនេះ ផ្ដោតលើបញ្ហាខាងក្រៅ ដែលអាចមានឥទ្ធិពលលើអាជីវកម្ម ដូចជាបញ្ហាសេដ្ឋកិច្ច នយោបាយប្រទេស បញ្ហាសង្គម និងផលវិបាកនៃបច្ចេកវិទ្យាជាដើម៕