ភ្នំពេញ៖ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានលើកឡើងថា កម្មវិធីបណ្តុះបណ្តាលសម្រាប់សហគ្រិនស្រ្តី (AWE) BizFest គឺជាកម្មវិធីដ៏មានសារសំខាន់មួយ ដែលបញ្ជាក់ឱ្យឃើញពីការលើកកម្ពស់សិទ្ធិអំណាចដល់ស្ត្រីឱ្យមានការរីកចម្រើនក្នុងវិស័យធុរកិច្ច និងនវានុវត្តន៍។ នេះបើតាមការចុះផ្សាយរបស់ក្រសួងពាណិជ្ជកម្ម កាលពីថ្ងៃទី៣១ ខែឧសភា ឆ្នាំ២០២៥។

ក្នុងពិធីបិទ «កម្មវិធីបណ្តុះបណ្តាលសម្រាប់សហគ្រិនស្រ្តី (AWE) BizFest» លោកជំទាវ ចម និម្មល ក៏បានលើកឡើងពីមជ្ឈមណ្ឌលសេវានាំចេញរបស់ក្រសួងពាណិជ្ជកម្ម និងបានលើកទឹកចិត្តដល់សហគ្រិន ពិសេសសហគ្រិនស្ត្រី ដែលត្រូវការជំនួយគាំទ្រពីក្រសួងពាណិជ្ជកម្ម អាចទំនាក់ទំនងមកក្រុមការងារនៃក្រសួងពាណិជ្ជកម្ម ឬតាមរយៈបណ្ដាញទំនាក់ទំនងសង្គមរបស់ក្រសួងពាណិជ្ជដោយផ្ទាល់ផងដែរ។

បន្ថែមពីនេះ លោកជំទាវ ចម និម្មល បានរំពឹងថា បេក្ខជនទាំងអស់ដែលទទួលបានជោគជ័យក្នុងវគ្គបណ្តាលបណ្តាលនាពេលនេះ នឹងបន្តជំរុញសក្តានុពលរបស់ខ្លួន តាមរយៈការពង្រីកអាជីវកម្ម និងជំរុញផលិតផលរបស់ខ្លួនទៅកាន់ទីផ្សារអន្តរជាតិ នាពេលខាងមុខ៕