ភ្នំពេញ៖ ផ្អែកលើក្របខ័ណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ បានផ្តល់និយមន័យ «សេដ្ឋកិច្ចឌីជីថល» ជាពីរនិយមន័យ គឺក្នុងន័យទូលាយ និងន័យចង្អៀត។ ចំពោះន័យទូលាយ សេដ្ឋកិច្ចឌីជីថល គឺសំដៅទៅដល់ប្រព័ន្ធទំនាក់ទំនងសេដ្ឋកិច្ច សង្គម និងវប្បធម៌ ដែលពឹងផ្អែកលើការប្រើប្រាស់ប្រព័ន្ធបច្ចេកវិទ្យាព័ត៌មាន និងគមនាគមន៍ (ICT) និងឌីជីថល។

ការកំណត់អំពីនិយមន័យ និងវិសាលភាពគ្របដណ្តប់នៃសេដ្ឋកិច្ចឌីជីថលនៅមិនទាន់មាន ភាពជាក់លាក់ និងអាចមានភាពខុសគ្នានៅតាមបណ្តាប្រទេសក្នុងតំបន់ និងក្នុងសកល ដូចនេះន័យចង្អៀត (Narrow Sense) វិញ សេដ្ឋកិច្ចឌីជីថល គឺសំដៅលើទីផ្សារដែលពឹងផ្អែកលើបច្ចេកវិទ្យាឌីជីថលក្នុងការសម្រួលដល់ការដោះដូរ ទំនិញ និងការផ្តល់សេវា តាមរយៈពាណិជ្ជកម្មតាមប្រព័ន្ធអេឡិចត្រូនិក ឬម៉្យាងទៀត គឺជាការប្រើប្រាស់បច្ចេកវិទ្យាឌីជីថល ផ្អែកលើអ៊ីនធឺណែតនៅក្នុងដំណើរការផលិតកម្ម និងការដោះដូរទំនិញ និងសេវា។

ដោយឡែក សម្រាប់វិស័យឈានមុខគេក្នុងសេដ្ឋកិច្ចឌីជីថល នៅក្នុងតំបន់ និងកម្ពុជា រួមមាន ពាណិជ្ជកម្មតាមប្រព័ន្ធអេឡិចត្រូនិក, ការដឹកជញ្ជូនទំនិញ និងអាហារ, ការទូទាត់សេវាធ្វើដំណើរអនឡាញ, ប្រព័ន្ធផ្សព្វផ្សាយអនឡាញ និងសេវាហិរញ្ញវត្ថុ។ រីឯ វិស័យចំនួន ៤ ទៀត គឺកំពុងស្ថិតនៅក្នុងដំណាក់កាលដំបូងនៅឡើយ រួមមាន បច្ចេកវិទ្យាសុខាភិបាល, សេវាកម្មសុសវែរ, បច្ចេកវិទ្យាប្លក់ឆេន និងបច្ចេកវិទ្យាអប់រំ៕

ប្រភពពី៖ សៀវភៅក្របខណ្ឌគោលនយោបាយសេដ្ឋកិច្ចនិងសង្គមឌីជីថលកម្ពុជា២០២១-២០៣៥