ភ្នំពេញ៖ ធនាគារអភិវឌ្ឍន៍កសិកម្មនិងជនបទ (ARDB) នឹងចុះជួបសហគមន៍កសិកម្មទំនើបម្ទេសដំណាក់ទ្រយឹង ដើម្បីពិភាក្សាអំពីតម្រូវការកម្ចីរបស់សហគមន៍សម្រាប់ចាប់ផ្តើមផលិតកម្មម្ទេស ដោយប្រើប្រាស់ប្រភពទឹកតាមផ្ទះ អណ្តូង ស្រះ និងការគាំទ្របច្ចេកទេសពីក្រសួងកសិកម្ម និងក្រុមហ៊ុនទិញម្ទេស ដែលជំហានដំបូងត្រូវរួមអនុវត្តពីសមាជិក ៧០គ្រួសារសិនក្នុងឆ្នាំ២០២៥។ នេះបើតាមការចុះផ្សាយរបស់ក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី២២ ខែឧសភា ឆ្នាំ២០២៥។

ជាមួយគ្នានេះ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម បានលើកឡើងថា ផែនការធុរកិច្ចម្ទេស បានរៀបចំ និងបានកំពុងពិនិត្យអនុម័តដែលគ្រោងផលិតម្ទេសតាមកិច្ចសន្យារវាងក្រុមហ៊ុនដៃគូ និងសហគមន៍ ដែលសម្របសម្រួលដោយក្រសួងកសិកម្ម តាមរយ:ថវិកាជំនួយឥតសំណងទុន ៤០% វិនិយោគបំពេញបន្ថែមពីគម្រោង CASDP និងការសម្របសម្រួលទំនាក់ទំនងផ្តល់កម្ចីជាមួយធនាគារ ARDB។

ឯកឧត្តម ហ៊ាន វណ្ណហន បានបន្តថា ក្នុងក្របខ័ណ្ឌគម្រោង CASDP សហគមន៍កសិកម្មទំនើបនេះ មានធុរកិច្ចម្ទេស ១៣៣គ្រួសារ លើផ្ទៃដីដាំដុះ ៣៨ ហិកតា ដោយរួមបញ្ចូលការសាងសង់ប្រព័ន្ធស្រោចស្រព ស្តារអាងទឹក ជីកស្រះ និងតទុយោទឹកបញ្ជូនទឹកដល់ចម្ការម្ទេស។ បន្ទាប់ពីជំនួបពិភាក្សានេះ ក្រុមការងារចុះពិនិត្យទីតាំងគ្រោងស្តារអភិវឌ្ឍប្រព័ន្ធស្រោចស្រព ដែលបានសិក្សារួច និងដាក់សំណើអនុម័តដេញថ្លៃសាងសង់ ដោយប្រើប្រាស់កញ្ចប់ថវិកាគម្រោង CASDP របស់ក្រសួងធនធានទឹក និងឧតុនិយម៕