ភ្នំពេញ៖ មន្ត្រីជំនាញម្ហូបអាហារ បានរកឃើញទំនិញហួសកាលបរិច្ឆេទ និងខូចគុណភាពសរុបចំនួន ៥១ ២៤៨គីឡូក្រាម នៅតាមបណ្តាទីផ្សារ និងផ្ទះលក់ទំនិញ នៃភូមិសាស្ត្រសំខាន់ៗក្នុងខេត្តកែប ពោធិ៍សាត់ ស្វាយរៀង ព្រៃវែង និងរាជធានីភ្នំពេញ កាលពីថ្ងៃទី២-៣ ខែមករា ឆ្នា២០២៤។

បើតាមអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ(ក.ប.ប) ទំនិញហួសកាលបរិច្ឆេទ និងខូចគុណភាពទាំងនោះរួមមាន ទឹកដោះគោខាប់ តែកញ្ចប់ តំណាប់ និងទំនិញផ្សេងៗទៀត។ ការរកឃើញនេះ ធ្វើឡើងខណៈពេលមន្រ្ដីស៊ើបអង្កេតនិងមន្ត្រីអធិការកិច្ចម្ហូបអាហារនៃសាខារាជធានី ខេត្តខាងលើ អនុវត្តតួនាទីក្នុងការធានាចរាចរទំនិញ ដែលមានសុវត្ថិភាពជូនប្រជាពលរដ្ឋ។ 

ក.ប.ប បានឱ្យដឹងថា ទំនិញចំនួន៥១ ២៤៨គីឡូក្រាមនោះ ត្រូវបានដកហូតយកមករក្សាទុកនៅទីស្នាក់ការសាខា ក្រោយពិនិត្យឃើញហួសកាលបរិច្ឆេទ និងខូចគុណភាពក្នុងការប្រើប្រាស់។ ក្រៅពីនេះ មន្រ្ដីជំនាញ ក៏បានបញ្ជ្រាបការយល់ដឹងដល់អាជីវករអំពីច្បាប់និងបទប្បញ្ញត្តិនានា ដើម្បីចៀសវាងការប្រព្រឹត្តបំពានដែលនាំឱ្យប្រឈមចំពោះមុខច្បាប់ និងបានផ្តល់ផ្ទាំងរូបភាពផ្សព្វផ្សាយ (Poster) អំពីសុវត្ថិភាពម្ហូបអាហារចំនួន ៧៧ផ្ទាំង និងខិត្តប័ណ្ណស្តីពីកិច្ចការហាឡាលចំនួន ២១សន្លឹកផងដែរ៕