ភ្នំពេញ៖ លោក កែវ ប៊ុនថេង អនុព័ន្ធពាណិជ្ជកម្មអមស្ថានឯកអគ្គរាជទូតកម្ពុជាប្រចាំតួកគីយ៉េ បានតាំងបង្ហាញនូវផលិតផលកម្ពុជាដែលមានសក្តានុពល នៅទិវាវប្បធម៌អន្តរជាតិលើកទី៦ ក្នុងសាកលវិទ្យាល័យបច្ចេកវិទ្យា OSTIM នាទីក្រុងអង់ការ៉ា ប្រទេសតួកគីយ៉េ ដើម្បីបង្ហាញពីវប្បធម៌ ប្រពៃណី ទំនៀមទម្លាប់ និងសក្តានុពលរបស់កម្ពុជាលើវិស័យពាណិជ្ជកម្ម ការវិនិយោគ និងទេសចរណ៍។

ផលិតផលមានសក្តានុពលសំខាន់ៗរបស់កម្ពុជានោះ មានដូចជា៖ អង្ករ ម្រេចកំពត គ្រាប់ស្វាយចន្ទី គ្រឿងឧបភោគបរិភោគ ក្រមាខ្មែរ និងវត្ថុអនុស្សាវរីយ៍ដែលធ្វើដោយដៃមួយចំនួន រួមនឹងចម្លាក់ គំនូរ ឧបករណ៍និងសម្ភារៈដែលបង្ហាញពីវប្បធម៌ខ្មែរ។ នេះបើតាមការចុះផ្សាយរបស់ក្រសួងពាណិជ្ជកម្ម កាលពីថ្ងៃទី០៩ ខែឧសភា ឆ្នាំ២០២៥៕