ភ្នំពេញ៖ ការធ្វើចរាចរ ការចែកចាយ ការលក់ផលិតផលថ្នាំជក់ (បារី) ក្លែងក្លាយ ក្លែងបន្លំម៉ាក និងមិនមានសារព្រមានសុខភាព គឺជាសកម្មភាពប្រព្រឹត្តល្មើសច្បាប់ស្តីពីម៉ាក ពាណិជ្ជនាម និងអំពើនៃការប្រកួតប្រជែងមិនស្មោះត្រង់ ដែលធ្វើឱ្យប៉ះពាល់ដល់ទំនុកចិត្តរបស់វិនិយោគិនស្របច្បាប់ ដែលកំពុងធ្វើធុរកិច្ចនៅកម្ពុជា។ នេះបើតាមអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» នៃក្រសួងពាណិជ្ជកម្ម។

យោងតាមសេចក្តីជូនដំណឹង ដែលចុះផ្សាយ កាលពីថ្ងៃទី៤ ខែមេសា ឆ្នាំ២០២៥ ការធ្វើចរាចរ ការចែកចាយផលិតផលក្លែងក្លាយខាងលើ ក៏ខុសច្បាប់ស្តីពីការគ្រប់គ្រងគុណភាព សុវត្ថិភាពលើផលិតផល ទំនិញ និងសេវា ច្បាប់ស្តីពីកិច្ចការពារអ្នកប្រើប្រាស់ ច្បាប់ស្តីពីការប្រកួតប្រជែង ច្បាប់ស្តីពីការត្រួតពិនិត្យផលិតផលថ្នាំជក់ និងបទប្បញ្ញត្តិពាក់ព័ន្ធជាធរមានផ្សេងៗទៀតផងដែរ។

ដើម្បីលើកកម្ពស់ការអនុវត្តច្បាប់ និងបទប្បញ្ញត្តិពាក់ព័ន្ធជាធរមាននៅកម្ពុជា ទប់ស្កាត់នូវអំពើល្មើសពាក់ព័ន្ធនឹងផលិតផលថ្នាំជក់ក្លែងក្លាយ ក្លែងបន្លំម៉ាក ដែលនៅតែបន្តកើតមានឡើង និងទប់ស្កាត់ផលប៉ះពាល់សុខភាពអ្នកប្រើប្រាស់ អគ្គនាយកដ្ឋាន ក.ប.ប. បានជំរុញឱ្យម្ចាស់ក្រុមហ៊ុន សហគ្រាស សិប្បករ ពាណិជ្ជករ អាជីវករ អ្នកចែកចាយ ផលិតផលថ្នាំជក់ អនុវត្តឱ្យបានត្រឹមត្រូវតាមបញ្ញត្តិនៃច្បាប់ និងឯកសារគតិយុត្ត ដែលកំពុងមានជាធរមាន។ ចំពោះករណីរកឃើញថា បុគ្គលណាមួយបានប្រព្រឹត្តល្មើសពាក់ព័ន្ធនឹងអំពើ និងការអនុវត្តមិនសុចរិតណាមួយនោះ អគ្គនាយកដ្ឋាន ក.ប.ប. នឹងចាត់វិធានការនានា ស្របតាមច្បាប់ និងបទប្បញ្ញត្តិជាធរមាន និងមិនមានការលើកលែងឡើយ បន្ទាប់ពីថ្ងៃចេញសេចក្តីជូនដំណឹង៕