ភ្នំពេញ៖ ការប្រកួតអុកចត្រង្គ ប្រដាល់ក្បាច់គុនបុរាណខ្មែរ សម្តែងក្បាច់គុនបុរាណខ្មែរយុទ្ធក្រមខម ទស្សនីយភាពល្ខោនយីកេខ្នាតធំរឿងតេជោជ្រែកដី ការប្រឡងចម្រៀង ប្រឡងបវរកញ្ញាស្រីស្រស់ប្រុសស្អាត និងបវរកញ្ញាវ័យចំណាស់ ពិសេសកម្មវិធីឡើងសសរខ្លាញ់យករង្វាន់ម៉ូតូនឹងមានក្នុងព្រឹត្តិការណ៍ «សង្ក្រាន្តព្រៃវែង២០២៥» រយៈពេល ០៥ថ្ងៃ ចាប់ពីថ្ងៃទី១២-១៦ ខែមេសា ឆ្នាំ២០២៥ ស្ថិតនៅទីរួមខេត្តព្រៃវែង។

ការរៀបចំព្រឹត្តិការណ៍ សង្ក្រាន្តព្រៃវែង ២០២៥ៗនេះ គឺជាទំនៀមទំលាប់ប្រពៃណីជាតិខ្មែរតាំងពីបុរាណដែលប្រជាពលរដ្ឋខ្មែរគ្រប់រូបប្រារព្ធឡើង ក្នុងគោលបំណងអបអរសាទរទទួលទេវតាឆ្នាំថ្មី សិរីសួស្តី ជ័យមង្គល និងជាឱកាសដ៏ល្អសម្រាប់ជួបជុំក្រុមគ្រួសារ។

តាមសេចក្តីជូនដំណឹងរបស់រដ្ឋបាលខេត្តព្រៃវែង ព្រឹត្តិការណ៍នេះ ក៏មានការប្រគុំតន្ត្រីសម័យ ការរាំលេងកំសាន្ត ការតាំងពិព័រណ៍បង្ហាញផលិតផល និងសម្ភារប្រើប្រាស់ក្នុងស្រុក លេងល្បែងប្រជាប្រិយ ការសម្តែងក្បាច់គុនបុរាណខ្មែរ បង្ហោះគោម និងបាញ់កាំជ្រួច ពិសេសខេត្តមានរៀបចំកម្មវិធីលេងកម្សាន្តតំបន់ត្រជាក់ចិត្តនៅសួនច្បារសម្តេច ជា ស៊ឹម ផងដែរ។