ភ្នំពេញ៖ ឯកឧត្តម Jean Luc lala ប្រធានផ្នែកកិច្ចការបរទេស និងការពារជាតិ នៃសភាបារាំង បានលើកឡើងថា កិច្ចព្រមព្រៀងរវាងសភាកម្ពុជា និងសភាបារាំង នឹងជួយឱ្យសភាកម្ពុជាក្លាយទៅជាសភាអេឡិចត្រូនិកក្នុងពេលឆាប់ៗខាងមុខ។ នេះបើយោងតាមការចុះផ្សាយរបស់ រដ្ឋសភានៃប្រទេសកម្ពុជា កាលពីថ្ងៃទី១៧ ខែមីនា ឆ្នាំ២០២៥។

ក្នុងជំនួបជាមួយឯកឧត្តម Jean Luc lala ឯកឧត្តម ឡេង ប៉េងឡុង អគ្គលេខាធិការរដ្ឋសភា បានស្នើសុំឱ្យសភាបារាំង បន្តកិច្ចសហប្រតិបត្តិការល្អថែមទៀតរវាងស្ថាប័ននីតិប្បញ្ញតិនៃប្រទេសកម្ពុជា-បារាំងផងដែរ។ ទន្ទឹមនឹងនេះ ឯកឧត្តម Jean luc Lala បានបញ្ជាក់ពីការ ឯកភាពចំពោះការលើកឡើងរបស់ឯកឧត្ដមអគ្គលេខាធិការរដ្ឋសភា នឹងស្នើឱ្យឯកឧត្ដមអគ្គលេខាធិការរដ្ឋសភា សរសេរគម្រោងតម្រូវការក្នុងការជួយជំរុញសភាកម្ពុជា ឱ្យទៅជាសភាអេឡិចត្រូនិកនាពេលខាងមុខផងដែរ។

ជាមួយគ្នានេះ ឯកឧត្តម ឡេង ប៉េងឡុង ក៏បានអរគុណចំពោះប្រធានរដ្ឋសភាបារាំង ដែលបានទទួលស្វាគមន៍ដល់សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃកម្ពុជា ដែលបានអញ្ជើញទៅបំពេញទស្សនកិច្ចនៅប្រទេសបារាំងកាលពីពេលកន្លងទៅ៕