ភ្នំពេញ៖ លោកជំទាវ ខា ឡេង រដ្ឋលេខាធិការក្រសួងពាណិជ្ជកម្ម លើកទឹកចិត្តសមាគមរោងចក្រផលិតក្រដាស Hong Kong Corrugated Paper Manufacturers’ Association (HKCPMA) ពិនិត្យលទ្ធភាពធ្វើពាណិជ្ជកម្ម វិនិយោគនៅកម្ពុជា និងជំរុញកិច្ចសហប្រតិបត្តិការទ្វេភាគី ឱ្យកាន់តែល្អប្រសើរបន្ថែមទៀត។ នេះបើយោងតាមការចុះផ្សាយរបស់ក្រសួងពាណិជ្ជកម្ម កាលពីថ្ងៃទី១៦ ខែមីនា ឆ្នាំ២០២៥។

ក្នុងជំនួបពិភាក្សាជាមួយគណៈប្រតិភូហុងកុងដឹកនាំដោយលោក Larry Szeto នៃសមាគមរោងចក្រផលិតក្រដាស លោកជំទាវ ខា ឡេង បានស្វាគមន៍ចំពោះគណៈប្រតិភូហុងកុងដែលចាប់អារម្មណ៍ក្នុងការស្វែងយល់អំពីការធ្វើពាណិជ្ជកម្ម និងឱកាសវិនិយោគផ្សេងៗនៅក្នុងប្រទេសកម្ពុជា។

ពាក់ព័ន្ធនឹងឱកាសវិនិយោគនេះ លោកជំទាវ ខា ឡេង ក៏បានបញ្ជាក់អំពីភាពអំណោយផល និងអត្ថប្រយោជន៍នានា ដែលនឹងទទួលបានក្នុងការធ្វើធុរកិច្ច-វិនិយោគនៅកម្ពុជា។ ជាមួយគ្នានេះ ក្រសួងពាណិជ្ជកម្ម ក៏បានប្តេជ្ញាចិត្តក្នុងការសម្របសម្រួល ផ្តល់ការគាំទ្រ និងបន្តជំរុញការធ្វើពាណិជ្ជកម្ម វិនិយោគ និងការការពារដល់វិនិយោគិនដែលបានធ្វើពាណិជ្ជកម្ម និងវិនិយោគក្នុងប្រទេសកម្ពុជា ផងដែរ៕