ភ្នំពេញ៖ រដ្ឋាភិបាលជប៉ុន បានផ្តល់ជំនួយឥតសំណង ៧២០ ៣០៤ដុល្លារ ដើម្បីអនុវត្តនូវគម្រោងចំនួនពីរនៅកម្ពុជា ដែលចុះហត្ថលេខាដោយឯកឧត្តម UENO Atsushi ឯកអគ្គរាជទូតវិសាមញ្ញនៃប្រទេសជប៉ុនប្រចាំកម្ពុជា កាលពីថ្ងៃទី២៦ ខែកុម្ភៈ ឆ្នាំ២០២៥។ នេះបើតាមការចុះផ្សាយរបស់ស្ថានទូតជប៉ុនប្រចាំកម្ពុជា នាថ្ងៃទី២៧ ខែកុម្ភៈ ឆ្នាំ២០២៥។

គម្រោងចំនួន២ នោះ រួមមាន៖ ទី១. គម្រោងពង្រឹងប្រព័ន្ធថែទាំវះកាត់តាមសហគមន៍នៅក្នុងតំបន់ភូមិភាគឦសាន្ត នៃប្រទេសកម្ពុជា ដែលអនុវត្តន៍ដោយអង្គការមូលនិធិសម្រាប់ការអភិវឌ្ឍន៍ និងជំនួយសង្រ្គោះអន្តរជាតិ(FIDR) មានថវិកាចំនួន ២៤៥ ៨៧២ដុល្លារ។ ចំពោះ ទី២. គម្រោង ធ្វើឱ្យប្រសើរឡើងនូវលទ្ធភាពទទួលបានសេវាអប់រំ និងគុណភាពសកម្មភាពអប់រំកុមារតូចរបស់សាលាមត្តេយ្យសិក្សារដ្ឋនៅខេត្តព្រះវិហារ អនុវត្តន៍ដោយអង្គការសន្តិស្ម័គ្រចិត្ត (SVA) មានថវិកាចំនួន ៤៧៤ ៤៣២ ដុល្លារ។

ជាមួយគ្នានេះ ឯកអគ្គរាជទូត អ៊ូអិណុ សង្ឃឹមថា ជំនួយឥតសំណងទាំងនេះ នឹងលើកកម្ពស់សុវត្ថិភាពប្រជាជន ក៏ដូចជាគុណភាពជីវិតរបស់ប្រជាជនដែលរស់នៅក្នុងទីតាំងគម្រោង និងលើកកម្ពស់មិត្តភាពជប៉ុន-កម្ពុជាបន្ថែមទៀត៕