ភ្នំពេញ៖ កម្ពុជា ស្នើឱ្យអាល្លឺម៉ង់ពិចារណាលើការបញ្ចប់កិច្ចព្រមព្រៀងស្ដីពី៖ កិច្ចសហប្រតិបត្តិការពាណិជ្ជកម្ម និងសេដ្ឋកិច្ច ការជៀសវាងការយកពន្ធត្រួតស៊ីគ្នា និងកម្ពស់ការការពារការវិនិយោគរួម។ នេះជាការលើកឡើងរបស់ឯកឧត្ដមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ កាលពីថ្ងៃទី២៧ ខែមករា ឆ្នាំ២០២៥។

ក្នុងជំនួបនេះ ឯកឧត្ដមឧបនាយករដ្ឋមន្ត្រី ប្រាក់ សុខុន និងឯកឧត្តម Stefan_Messerer ឯកអគ្គរដ្ឋទូតនៃសហព័ន្ធអាល្លឺម៉ង់ប្រចាំកម្ពុជា បានយល់ស្របគ្នាថា ប្រទេសទាំងពីរនៅមានឱកាសជាច្រើនទៀតសម្រាប់ពង្រីក ពាណិជ្ជកម្មទ្វេភាគី ដែលមានលើសពី ១ប៊ីលានដុល្លារ នាឆ្នាំកន្លងទៅនេះ។

ជាមួយគ្នានេះ ឯកអគ្គរដ្ឋទូត Messerer បានអះអាងថា អាល្លឺម៉ង់ នឹងប្តេជ្ញាបំពេញតួនាទីជាដៃគូដ៏រឹងមាំសម្រាប់ការអភិវឌ្ឍសេដ្ឋកិច្ច-សង្គមរបស់កម្ពុជា ខណៈពេលដែលប្រទេសទាំងពីរកំពុងបង្កើនកិច្ចប្រឹងប្រែងដើម្បីពង្រឹងទំនាក់ទំនងទ្វេភាគីបន្ថែមទៀត៕