ភ្នំពេញ៖ ក្នុងឆ្នាំ២០២៤ កំពង់ផែស្វយ័តភ្នំពេញ (PPAP) រកចំណូលបាន ៤១ ៥៨៨ ១៧២ដុល្លារ ដែលមានការកើនឡើងចំនួន ២០% បើធៀបនឹងឆ្នាំ២០២៣ ដែលមានចំនួន ៣៤ ៥៥៨ ៥១១ដុល្លារ។ បើតាមសេចក្តីប្រកាសព័ត៌មានរបស់ PPAP ចេញផ្សាយកាលពីថ្ងៃទី១៦ ខែមករា ឆ្នាំ២០២៤ ចំណូលក្នុងឆ្នាំ២០២៤នេះ គឺមិនទាន់ធ្វើសវនកម្មទេ។

កំពង់ផែស្វយ័តភ្នំពេញ បានបញ្ជាក់ថា ក្នុងចំណូលជាង ៤១លានដុល្លារនេះ គឺបានពីចំណូលប្រតិបត្តិការផែចំនួន ៣៤ ៥៦៣ ៧៥៦ដុល្លារ កើនឡើង ២១%, ចំណូលពីអាជ្ញាធរផែ មានទំហំ ៥ ៨៣៤ ៤៨១ដុល្លារ មានការកើនឡើងចំនួន ២១% និងចំណូលពីសេវាកម្មផ្សេងៗ មានទឹកប្រាក់ ១ ១៨៩ ៩៣៥ដុល្លារ។

ចំពោះ ក្នុងខែធ្នូ ឆ្នាំ២០២៤ កំពង់ផែស្វយ័តភ្នំពេញ រកចំណូលបាន ៤ ១០៨ ៩៤៤ ដុល្លារ ដែលកើនឡើងបាន៤០% បើធៀបនឹងខែធ្នូ ឆ្នាំ២០២៣ ដែលមានទឹកប្រាក់ចំនួន ២ ៩៤១ ២៨១ដុល្លារ។ ជាមួយគ្នានេះ កុងតឺន័រ ដែលបានឆ្លងកាត់កំពង់ផែស្វយ័តភ្នំពេញក្នុងឆ្នាំ២០២៤ មានចំនួន ៤៨០ ២០០ទូ ដែលកើនឡើងបាន ២១,១៩% ៕