ភ្នំពេញ៖ ម្ហូបអាហារ បង្អែម នំចំណី ផ្លែឈើ និងផលិតផលជាច្រើនមុខរបស់ខេត្តបាត់ដំបង ត្រូវតាំងបង្ហាញនៅក្នុងពិព័រណ៍ម្ហូបអាហារ និងបង្អែមខ្មែរ ដើម្បីឱ្យប្រជាពលរដ្ឋ ភ្ញៀវទេសចរជាតិ និងអន្តរជាតិ បានទស្សនា និងភ្លក់រសជាតិ។ បើតាមការចុះផ្សាយរបស់មន្ទីទេសចរណ៍ខេត្តបាត់ដំបង ម្ហូបអាហារ និងបង្អែមនេះ តាំងបង្ហាញនៅតាមស្តង់របស់រដ្ឋបាលក្រុង, មន្ទីរ-អង្គភាព, រដ្ឋបាលស្រុកទាំង១៣ និងអាជីវករក្នុងខេត្តបាត់ដំបង ដើម្បីអបអរពិធីបុណ្យឆ្លងឆ្នាំសកល២០២៤-២០២៥។

ពិព័រណ៍ដែលរៀបចំឡើងនៅមុខបរិវេណសារមន្ទីរប្រវត្តិសាស្ត្រខេត្តបាត់ដំបងនេះ គឺដើម្បីបង្ហាញពីស្នាដៃអ្នកធ្វើម្ហូបអាហារ និងបង្អែមខ្មែរ ក្នុងការផ្សព្វផ្សាយពីមុខម្ហូបប្រចាំតំបន់ដ៏សម្បូរបែបជាច្រើនរបស់អ្នកបាត់ដំបង និងទាក់ទាញភ្ញៀវជាតិ និងអន្តរជាតិ ព្រមទាំងលើកស្ទួយវិស័យទេសចរណ៍ក្នុងខេត្ត តាមរយៈការជូនដំណឹងឱ្យភ្ញៀវទេសចរបានស្គាល់ពីស្នាដៃចុងភៅ និងអ្នកធ្វើម្ហូបខ្មែរនៅខេត្តបាត់ដំបង។ ពិព័រណ៍ដែលរៀបចំឡើងនៅថ្ងៃទី២៩-៣០ ធ្នូ នេះ ក៏បានបង្ហាញពីសក្តានុពល ក៏ដូចជាផ្សព្វផ្សាយពីវប្បធម៌ ប្រពៃណី ទំនៀមទម្លាប់ដ៏សម្បូរបែបរបស់អ្នកបាត់ដំបងទៅកាន់ភ្ញៀវទេសចរផងដែរ៕