ភ្នំពេញ៖ សម្តេចតេជោ ហ៊ុន សែន ប្រធានព្រឹទ្ធសភា លើកទឹកចិត្តឱ្យអារ៉ាប៊ីសាអូឌីតចាប់ផ្តើមកិច្ចសហប្រតិបត្តិការស្នូល តាមរយៈការនាំចេញអង្ករពីកម្ពុជាទៅអារ៉ាប៊ីសាអូឌីត លើការវិនិយោគរៀបចំម៉ាស៊ីនកិនស្រូវ ស្តុក និងវេចខ្ចប់នៅកម្ពុជា ដើម្បីនាំចេញទៅប្រទេសនានាក្នុងតំបន់ផងដែរ។ ការលើកទឹកចិត្តនេះ ធ្វើឡើងក្នុងជំនួបជាមួយឯកឧត្តមបណ្ឌិត អាប់ឌុលឡា ម៉ូហាម៉េដ អ៊ីប្រាហ៊ីម អាល-សេក្ខ ប្រធានសភា នៃអារ៉ាប៊ីសាអូឌីត។

ក្នុងជំនួប កាលពីថ្ងៃទី៩ ខែធ្នូ ឆ្នាំ២០២៤ នៅវិមានរដ្ឋសភា រាជធានីរីយ៉ាដ សម្តេចតេជោ ហ៊ុន សែន បានបន្តថា ប្រទេសទាំងពីរ អាចបំពេញបន្ថែមគ្នាទៅវិញទៅមកបាន ពីព្រោះអារ៉ាប៊ីសាអូឌីតមានសន្តិសុខថាមពល រីឯកម្ពុជា មានសន្តិសុខស្បៀង ប្រព័ន្ធស្រោចស្រពល្អជាងមុន និងមានអតិរេកស្រូវផងដែរ។ ជាមួយគ្នានេះ ឯកឧត្តមបណ្ឌិត អាប់ឌុលឡា ម៉ូហាម៉េដ អ៊ីប្រាហ៊ីម អាល-សេក្ខ បានលើកឡើងថា អារ៉ាប៊ីសាអូឌីត នឹងបើកស្ថានទូតនៅកម្ពុជានាពេលខាងមុខ ដើម្បីងាយស្រួលដល់ការជំរុញ និងពង្រឹងបន្ថែមទៀតនូវទំនាក់ទំនងទ្វេភាគី រវាងភាគីទាំងពីរ។

ឯកឧត្តមប្រធានសភាអារ៉ាប៊ីសាអូឌីត បានបន្តថា ប្រទេសជាច្រើនមានទំនាក់ទនងជាមួយអារ៉ាប៊ីសាអូឌីត តាមរយៈការផ្សារភ្ជាប់វិស័យសេដ្ឋកិច្ច ដោយសារអារ៉ាប៊ីសាអូឌីត យកចិត្តទុកដាក់ខ្លាំងលើការលើកកម្ពស់សេដ្ឋកិច្ច សាសនា និងកិច្ចសហប្រតិបត្តិការលើវិស័យផ្សេងៗទៀត ពិសេសវិស័យប្រេងដែលជាវិស័យសំខាន់បំផុតរបស់អារ៉ាប៊ីសាអូឌីត៕