ភ្នំពេញ៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ អំពាវនាវឱ្យថ្នាក់ដឹកនាំ ភាគីពាក់ព័ន្ធ និងប្រព័ន្ធផ្សព្វផ្សាយចិនទាំងអស់ ជួយផ្សព្វផ្សាយអំពីសក្តានុពលទេសចរណ៍ដ៏សម្បូរបែប និងរៀបចំកញ្ចប់ទស្សនកិច្ចឱ្យបានច្រើនមកកម្ពុជា ដើម្បីកៀរគរភ្ញៀវទេសចរបន្ថែមមកកម្ពុជា។ ឯកឧត្តម ហួត ហាក់ លើកឡើងដូច្នេះ ក្នុងកម្មវិធី GX Foundation Khmer Cuisine Charity Dinner ។

ក្នុងកម្មវិធីខាងលើនេះ ឯកឧត្តមរដ្ឋមន្ត្រីក្រសួងទេសចរណ៍ បានលើកឡើងពីសក្តានុពលទេសចរណ៍របស់ កម្ពុជា, បង្ហាញឃ្លីបវីដេអូអំពីគោលដៅទេសចរណ៍សំខាន់ៗ និងឃ្លីបវីដេអូទេសចរណ៍កម្ពុជា-ចិន ដែលកើតឡើងពីកិច្ចសហប្រតិបត្តិការរវាងក្រសួងទេសចរណ៍កម្ពុជា និងស្ថានឯកអគ្គរដ្ឋទូតចិនប្រចាំនៅកម្ពុជា។ ឯកឧត្តម ហួត ហាក់ ក៏បានបង្ហាញពីសុខសន្តិភាព សាធារណៈ និងសណ្តាប់ធ្នាប់សង្គម រួមទាំងការអភិវឌ្ឍសង្គម សេដ្ឋកិច្ច និងបរិយាកាសអនុគ្រោះសម្រាប់ការវិនិយោគនៅកម្ពុជាផងដែរ។

កម្មវិធី GX Foundation Khmer Cuisine Charity Dinner បានប្រព្រឹត្តទៅ កាលពីថ្ងៃទី៣-៤ ខែធ្នូ ឆ្នាំ២០២៤ នៅតំបន់រដ្ឋបាលពិសេសហុងកុង ប្រទេសចិន ដើម្បីផ្សព្វផ្សាយនិងលើកកម្ពស់ម្ហូបអាហារខ្មែរ, ផ្សព្វផ្សាយសក្តានុពលទេសចរណ៍របស់កម្ពុជា សំដៅកៀរគរស្វែងរកមូលនិធិមនុស្សធម៌សម្រាប់គាំទ្រដល់គម្រោង «Project for Health Protection Against Dengue Fever» នៅខេត្តកំពង់ស្ពឺ និងសម្រាប់សកម្មភាពមនុស្សធម៌ដទៃទៀត នៅកម្ពុជា៕