ភ្នំពេញ៖ ក្រសួងពាណិជ្ជកម្ម និងធនាគារអភិវឌ្ឍន៍ជនបទ និងកសិកម្ម (ARDB Bank) ចុះអនុស្សរណៈនៃការយោគយល់គ្នា (MOU) ដើម្បីបង្កើតកិច្ចសហប្រតិបត្តិការភាពជាដៃគូលើការអភិវឌ្ឍវិស័យកសិកម្ម តាមរយៈការផ្តល់ហិរញ្ញប្បទាន ដែលមានអត្រាការប្រាក់សមរម្យ។ នេះបើតាមការចុះផ្សាយរបស់ក្រសួងពាណិជ្ជកម្ម នាថ្ងៃទី៣ ខែធ្នូ ឆ្នាំ២០២៤។

កិច្ចសហការរវាងភាគីទាំងពីរនេះ ក៏មានក្នុងគោលបំណងជំរុញភាពជាដៃគូ ក្នុងវិស័យពាណិជ្ជកម្ម ជំរុញការប្រើប្រាស់ផលិតផល និងសេវារបស់គូភាគី ដោយផ្តោតលើការអនុវត្តច្បាប់ស្តីពីប្រតិបត្តិការ ដែលមានកិច្ចធានា ការផ្តល់ទិន្នន័យសន្ទស្សន៍ថ្លៃទំនិញក្នុងទីផ្សារ ការគាំទ្រការកែច្នៃផលិតផលក្នុងស្រុក និងការនាំចេញ។ គួរបញ្ជាក់ថា ការចុះ MOU នៅទីស្តីការក្រសួងពាណិជ្ជកម្ម ត្រូវបានធ្វើឡើងក្រោមអធិបតីភាព លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម៕