ភ្នំពេញ៖ អង្គការដើម្បីភាពញញឹមនៃកុមារ(PSE) បានជជែកពិភាក្សា និងស្នើសុំរដ្ឋមន្ត្រីក្រសួងកសិកម្មពីករផ្តល់កិច្ចសហការក្នុងការបណ្ដុះបណ្ដាល ផ្នែកកសិកម្មដល់សិស្សរបស់អង្គការ PSE ។ ក្នុងជំនួបជាមួយនឹងតំណាងអង្គការ PSE កាលពីថ្ងៃទី១០ ខែវិច្ឆិកា ឆ្នាំ២០២៣នេះ ឯកឧត្តមរដ្ឋមន្ត្រី ឌិត ទីណា បញ្ជាក់ថា គួរមានការសិក្សាបន្ថែម ថាតើក្រសួងកសិកម្មនិងអង្គការ PSE អាចសហការគ្នាក្នុងទម្រង់បែបណា?

ក្នុងជួបពិភាក្សាការងារជាមួយនឹងឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ តំណាងអង្គការដើម្បីភាពញញឹមនៃកុមារ(PSE) ស្នើសុំកិច្ចសហការពីរដ្ឋមន្ត្រីបង្កើតវគ្គបណ្ដុះបណ្ដាលជំនាញកសិកម្មដល់សិស្សរបស់ខ្លួន។ សំណើរនេះ បន្ថែមពីលើជំនាញរបស់អង្គការដែលមានស្រាប់ ដូចជា វគ្គបណ្ដុះបណ្ដាលផ្នែកសណ្ឋាគារនិងបដិសណ្ឋារកិច្ច ពាណិជ្ជកម្ម និងជំនាញផ្សេងៗទៀត។

ឯកឧត្តម ឌិត ទីណា បានស្វាគមន៍ និងបានគូសបញ្ជាក់ពីការគាំទ្ររបស់ក្រសួងក្នុងការសហការផ្ដល់ការបណ្ដុះបណ្ដាលផ្នែកកសិកម្មដល់សិស្សរបស់អង្គការ PSE ។ តាមរយៈការចុះផ្សាយរបស់ក្រសួងកសិកម្ម កាលពីថ្ងៃទី ១០ ខែវិច្ឆិកា ឆ្នាំ២០២៣នេះ ឯកឧត្តមរដ្ឋមន្ត្រី បានបញ្ជាក់ដូច្នេះថា៖«គួរមានការសិក្សាបន្ថែមទៀត តើក្រសួងកសិកម្មនិងអង្គការ PSE អាចសហការគ្នាក្នុងទម្រង់បែបណា ដើម្បីឱ្យសិស្សអាចទទួលបានវគ្គបណ្ដុះបណ្ដាលផ្នែកកសិកម្ម ដែលបម្រើដល់សេចក្ដីត្រូវការនៃទីផ្សារការងារពិតប្រាកដ»។

អង្គការ PSE រំពឹងថា ក្រសួងនឹងពិចារណាផ្ដល់ការគាំទ្រដល់អង្គការ ដើម្បីបណ្ដុះបណ្ដាលសិស្សរបស់ខ្លួន នៅក្នុងវិស័យកសិកម្មនេះ ដែលកំពុងតែមានត្រូវការទីផ្សារការងារលើវិស័យកាន់តែច្រើន។ សូមជម្រាបថា បច្ចុប្បន្ននេះ អង្គការ PSE កំពុងតែផ្ដល់ការបណ្ដុះបណ្ដាលដល់សិស្សដែលមានជីវភាពក្រក្សត់យ៉ាងហោចណាស់ ៦,៥០០នាក់ នៅរាជធានីភ្នំពេញ ខេត្តសៀមរាប និងខេត្តព្រះសីហនុ៕