ភ្នំពេញ៖ ឈ្មួញជើងសា ឬ Broker គឺជាជនកណ្តាលដែលនឹងធ្វើជាស្ពានរវាងវិនិយោគិន និងផ្សារមូលបត្រ ដែលពួកគេនឹងដើរតួជាអ្នកទិញនិងលក់ភាគហ៊ុន និងប័ណ្ណបំណុល ជាដើម។ ឈ្មួញជើងសា គឺជាសមាជិកនៃផ្សារមូលបត្រ ដែលមានសិទ្ធគ្រប់គ្រាន់ក្នុងការធ្វើប្រតិបត្តិការជួញដូរ នៅលើផ្សារហ៊ុន ហើយនឹងកាត់កម្រៃជើងសាពីការទិញលក់ទាំងនោះវិញ។

ពីមុនមានតែអ្នកដែលមានធនធានច្រើនប៉ុណ្ណោះ ដែលអាចរកសេវាកម្មពីឈ្មួញជើងសាទាំងនេះបាន ប៉ុន្តែនាពេលបច្ច្បុន្ន គ្រប់គ្នាអាចមានសិទ្ធក្នុងការប្រើប្រាស់សេវាកម្មឈ្មួញជើងសាគ្រប់ៗគ្នាបាន។ ឈ្មួញជើងសារ ឬ Broker មាន២ប្រភេទ៖

ទី១៖ ឈ្មួញជើងសា Discount (Discount broker) ឈ្មួញជើងសាប្រភេទនេះ មិនផ្តល់សេវាកម្ម ដូចជាការគ្រប់គ្រងហិរញ្ញវត្ថុ, មិនផ្តល់សេវាកម្មស្រាវជ្រាវ ឬវិភាគទីផ្សារ និងមិនផ្តល់ការប្រឹក្សាដល់វិនិយោគិននោះទេ។ ពួកគេផ្តល់ត្រឹមសេវាកម្មការជួញដូរតែប៉ុណ្ណោះ ក្នុងពេលបច្ចុប្បន្នពួកគេនឹងផ្តល់ Platform សម្រាប់វិនិយោគិនជួញដូរបានដោយខ្លួនឯង។ វិនិយោគិន គឺជាអ្នកចាត់ចែងពេញសិទ្ធទៅលើហិរញ្ញវត្ថុរបស់គេដោយផ្ទាល់។

ទី២៖ ឈ្មួញជើងសាពេញសេវាកម្ម (Full-service broker) ពួកគេផ្តល់សេវាកម្មដល់វិនិយោគិន ដូចជាការគ្រប់គ្រងហិរញ្ញវត្ថុ, ផ្តល់សេវាកម្មស្រាវជ្រាវឬវិភាគទីផ្សារដល់វិនិយោគិន និងផ្តល់ការប្រឹក្សាហិរញ្ញវត្ថុដល់វិនិយោគិនផងដែរ។ ប៉ុន្តែ ពួកគេក៏នឹងយកកម្រៃជើងសាខ្ពស់អាស្រ័យទៅតាមប្រភេទសេវាកម្មដែលគេផ្តល់ឱ្យ។

នៅក្នុងប្រទេសកម្ពុជា មានឈ្មួញជើងសាដែលជាសមាជិកនិយ័តករមូលបត្រចំនួន១២ ក្រុមហ៊ុន រួមមានដូចជា ១៖ អេសប៊ីអាយ រ៉ូយ៉ាល់ ស៊ីឃ្យួរឹធី, ២៖ ភ្នំពេញ ស៊ីឃ្យូរីធី ភីអិលស៊ី, ៣៖ យាន់តា ស៊ីឃ្យួរឹធី (ខេមបូឌា) ភីអិលស៊ី, ៤៖ កម្ពុ ស៊ីឃ្យួរឹធី ភីអិលស៊ី, ៥៖ អេស៊ីលីដា ស៊ីឃ្យួរឹធី ភីអិលស៊ី, ៦៖ ខេមបូឌា-វៀតណាម ស៊ីឃ្យួរឹធី ឯ.ក, ៧៖ ខេប ស៊ីឃ្យួរឹធី លីមីធីត, ៨៖ ហ្គោលដេន ហ្វ័រឈូន (ខេមបូឌា) ស៊ីឃ្យួរឹធី ភីអិលស៊ី, ៩៖ កាណា ស៊ីឃ្យួរឹធី អិលធីឌី, ១០៖ អ អេច ប៊ី ស៊ីឃ្យួរឹធី (ខេមបូឌា) ម.ក, ១១៖ ភីភី លីង ស៊ីឃ្យួរឹធី ឯ.ក, ១២៖ ក្រុមហ៊ុន ខេមបូឌា ស៊ីឃ្យួរឹធី ម.ក, ១៣៖ ក្រុមហ៊ុនរ៉ូយ៉ាលគ្រុប ស៊ីឃ្យូរីធី ម.ក និង១៤៖ បេនចារ៉ាន អ៊ែសេត មេនេចម៉ិន (ខេមបូឌា) ម.ក៕