ភ្នំពេញ៖ លោកស្រី លឹម ចាន់ធីតា ប្រធាននាយកដ្ឋានប្រតិបត្តិការសាជីវកម្មធានាឥណទានកម្ពុជា (CGCC) លើកឡើងថា CGCC មានតួនាទីគាំទ្រដល់ស្ថាប័នហិរញ្ញវត្ថុ និងគ្រឹះស្ថានមីក្រូហិរញ្ញវត្ថុ ពង្រីកលទ្ធភាពផ្តល់កម្ចីដល់សហគ្រាសខ្នាតមីក្រូ តូច និងមធ្យម (MSMEs) តាមរយៈការធានាឥណទាន។

លោកស្រី លឹម ចាន់ធីតា បន្តថា ការធានាឥណទានរបស់ CGCC បានធ្វើឱ្យ MSMEs រហូតដល់ជាង ៩០% នៃគណនីដែលមានការធានាសរុប ការធានាលើកម្ចីហិរញ្ញវត្ថុ។ លោកស្រី លឹម ចាន់ធីតា លើកឡើងដូច្នេះ ក្នុងកម្មវិធីសន្និសីទមីក្រូហិរញ្ញវត្ថុ ប្រចាំឆ្នាំ២០២៤ ដែលរៀបចំឡើងដោយសមាគមមីក្រូហិរញ្ញវត្ថុកម្ពុជា ស្តីអំពី «និរន្តរភាព និងបរិយាបន្នមីក្រូហិរញ្ញវត្ថុ៖ បច្ចុប្បន្នភាព និងដំណើរវិវឌ្ឍន៍នៃវិស័យ» នៅខេត្តសៀមរាប។

ក្នុងសន្និសីទមីក្រូហិរញ្ញវត្ថុ ដែលរៀបចំឡើង កាលពីថ្ងៃទី០៤ ខែវិច្ឆិកា ឆ្នាំ២០២៤ នេះ លោកស្រី លឹម ចាន់ធីតា បានលើកឡើងពីកិច្ចពិភាក្សា ក្រោមប្រធានបទ «កត្តាប្រឈម និងដំណោះស្រាយសំខាន់ៗក្នុងការពង្រឹងដំណោះស្រាយជាយុទ្ធសាស្រ្តដល់ប្រតិបត្តិការរបស់គ្រឹះស្ថានធនាគារ និងហិរញ្ញវត្ថុ ក្នុងការធានាបាននូវភាពធន់នៃវិស័យ»។ សន្និសីទនេះដែល រៀបចំឡើងដើម្បីបង្ហាញពីការប្ដេជ្ញាចិត្តរបស់សមាគមមីក្រូហិរញ្ញវត្ថុ ក្នុងការពង្រីកបរិយាបន្នហិរញ្ញវត្ថុ និងលើកកម្ពស់កំណើនប្រកបដោយការទទួលខុសត្រូវ ស្របដោយគោលការណ៍អភិវឌ្ឍន៍សកល ព្រមទាំងធ្វើឱ្យកម្ពុជា ក្លាយជាគំរូសម្រាប់ហិរញ្ញប្បទាន ប្រកបដោយនិរន្តភាព៕