ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគចំនួន៣១ ដែលមានទុនវិនិយោគសរុបប្រមាណ ២២៦លានដុល្លារ ក្នុងខែតុលា ឆ្នាំ២០២៤។ តាមសេចក្តីប្រកាសរបស់ CDC នាថ្ងៃទី០៥ ខែវិច្ឆិកា ឆ្នាំ២០២៤ ក្នុងគម្រោងវិនិយោគចំនួន៣១ នេះ មានគម្រោងថ្មីចំនួន៣០គម្រោង និងគម្រោងពង្រីកផលិតកម្មចំនួន ១គម្រោង អាចបង្កើតការងារបានប្រមាណ ១៦ពាន់កន្លែង។

ក្នុងចំណោមគម្រោងវិនិយោគសរុបទាំង៣១ នេះ គម្រោងវិនិយោគដែលមានទីតាំងស្ថិតនៅក្រៅតំបន់សេដ្ឋកិច្ចពិសេសមានចំនួន ២១គម្រោង និងគម្រោងវិនិយោគដែលមានទីតាំងស្ថិតនៅក្នុងតំបន់សេដ្ឋកិច្ចពិសេសមានចំនួន ១០គម្រោង។ គម្រោងទាំង ៣១នេះ មានគម្រោងវិនិយោគក្នុងវិស័យហេដ្ឋារចនាសម្ព័ន្ធចំនួន១, គម្រោងបង្កើតរោងចក្រកាត់ដេរសម្លៀកបំពាក់, ស្បែកជើង និងកាបូប, គម្រោងបង្កើតរោងចក្រផលិតសម្ភារប្រើប្រាស់ក្នុងផ្ទះ, សម្ភារបរិក្ខារសម្រាប់បោះតង់, គ្រឿងសង្ហារឹម, គ្រឿងតុបតែងលម្អ និងគម្រោងផ្សេងៗទៀត។

CDC បានឱ្យដឹងថា ក្នុងខែតុលា ឆ្នាំ២០២៤នេះ ការវិនិយោគមកពីប្រទេសចិនស្ថិតនៅលំដាប់លេខរៀងទី១ ដែលបានរួមចំណែក ៥៣,៣៩% នៃទុនវិនិយោគសរុប ខណៈពេលដែលការវិនិយោគក្នុងស្រុកគ្របដណ្តប់ ២៩,៤៧% នៃទុនវិនិយោគសរុប៕