ភ្នំពេញ៖ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានចូលទស្សនា និងពិនិត្យស្ថានភាពជីវភាពជាក់ស្តែងរបស់ប្រជាសហគមន៍ ដែលពឹងអាស្រ័យលើរមណីយដ្ឋានសហគមន៍អេកូទេសចរណ៍អូរឬស្សីកណ្តាល (អូរច្រឡង់)។ នេះបើតាមការចុះផ្សាយរបស់ក្រសួងទេសចរណ៍ នាថ្ងៃទី២៤ ខែតុលា ឆ្នាំ២០២៤។

ការទៅទស្សនារមណីយដ្ឋានអេកូទេសចរណ៍អូរច្រឡង់របស់ឯកឧត្តមរដ្ឋមន្រ្តីក្រសួងទេសចរណ៍នេះ ត្រូវបានធ្វើឡើង កាលពីថ្ងៃទី២៣ ខែតុលា ឆ្នាំ២០២៤ នៅឃុំអូរឬស្សីកណ្តាល ស្រុកសៀមបូក ខេត្តស្ទឹងត្រែង។ រមណីយដ្ឋានអូរច្រឡង់ ជាតំបន់ទេសចរណ៍ដែលគួរឱ្យចាប់អារម្មណ៍ដោយមានទឹកហូរវែងអន្លាយខួបប្រាំង ខួបវស្សា និងព្រៃធម្មជាតិដ៏ស្រស់ស្អាត អាចងួតលេង និងស្តាប់សំឡេងសត្វយំដែលនាំឱ្យភ្ញៀវទេសចរមានអារម្មណ៍ស្រស់ស្រាយបំបាត់ទុកកង្វល់ ពិសេសក៏ជួយដល់ជីវភាពប្រជាពលរដ្ឋនៅក្នុងសហគមន៍ទេសចរណ៍នេះផងដែរ៕