ភ្នំពេញ៖ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានលើកឡើងថា ប្រតិបត្តិការទូទាត់ឆ្លងដែន បានជំរុញពាណិជ្ជកម្មអេឡិចត្រូនិក សម្រួលការទូទាត់ដល់ទេសចរណ៍អន្តរជាតិ និងវិនិយោគិនបរទេស ព្រមទាំងការលើកកម្ពស់បរិយាបន្នហិរញ្ញវត្ថុកម្ពុជាផងដែរ។ នេះបើតាមការចុះផ្សាយរបស់ធនាគារជាតិនៃកម្ពុជា នាថ្ងៃទី២៣ ខែតុលា ឆ្នាំ២០២៤។

ក្នុងនាមជាវាគ្មិនមួយរូបក្នុងកិច្ចពិភាក្សាស្តីពីប្រធានបទ«អនាគតនៃប្រតិបត្តិការទូទាត់ឆ្លងដែន៖ កាន់តែលឿន កាន់តែសុវត្ថិភាព និងកិច្ចសហប្រតិបត្តិការល្អ» នៅក្នុងព្រឹត្តិការណ៍ G20 នេះ លោកជំទាវបណ្ឌិត ជា សិរី ក៏បានលើកឡើងថា កម្ពុជា បានជម្នះបញ្ហាប្រឈមនានាក្នុងដំណើរតភ្ជាប់ប្រព័ន្ធទូទាត់ឆ្លងដែនជាមួយប្រទេសមួយចំនួននាពេលកន្លងមកទៀតផង។

ទេសាភិបាល ធនាគារជាតិនៃកម្ពុជា ក៏បានបញ្ជាក់បន្ថែមថា នាពេលបច្ចុប្បន្ន កម្ពុជា កំពុងពង្រីកផែនការតភ្ជាប់ជាមួយបណ្តាប្រទេសក្នុងតំបន់និងពិភពលោក ព្រមទាំងការពង្រឹងកិច្ចសហប្រតិបត្តិការជាមួយភាគីពាក់ព័ន្ធទៀតផង។ គួរបញ្ជាក់ថា ព្រឹត្តិការណ៍ G20 នេះ រៀបចំឡើងដោយធនាគារសម្រាប់ការទូទាត់អន្តរជាតិ (BIS) នាថ្ងៃទី២២ ខែតុលា ឆ្នាំ២០២៤ នៅទីស្នាក់ការកណ្តាលនៃមូលនិធិរូបិយវត្ថុអន្តរជាតិ (IMF) ក្នុងទីក្រុងវ៉ាស៊ីនតោន សហរដ្ឋអាម៉េរិក៕