ភ្នំពេញ៖ ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC) បានស្នើឱ្យក្រុមហ៊ុន Toyota បន្តពិនិត្យលទ្ធភាពជ្រើសរើសការវិនិយោគលើវិស័យជាសក្តានុពលផ្សេងៗទៀតនៅកម្ពុជា។ ឯកឧត្តម ស៊ុន ចាន់ថុល ស្នើបែបនេះនៅក្នុងជំនួបពិភាក្សាការងារជាមួយឧកញ៉ា គង់ ងួន អគ្គនាយកក្រុមហ៊ុន តូយ៉ូតា ខេមបូឌា (Toyota Cambodia)។

ក្នុងជំនួបនាថ្ងៃទី១៨ ខែតុលា ឆ្នាំ២០២៤នេះ ឧកញ៉ា គង់ ងួន ក៏បានលើកឡើងអំពីវឌ្ឍនភាពនៃការវិនិយោគរបស់ក្រុមហ៊ុនតូយ៉ូតា នៅកម្ពុជា ដែលសម្រេចបានការពង្រីកអាជីវកម្មបន្ថែមជាបន្តបន្ទាប់ ដូចមានការសម្ពោធដាក់ឱ្យដំណើរការជាផ្លូវការនូវរោងចក្រផ្គុំ និងដំឡើងរថយន្ត តូយ៉ូតា កាលពីខែឧសភា ឆ្នាំ២០២៤។

ជាមួយគ្នានេះ ឯកឧត្តម ស៊ុន ចាន់ថុល ក៏បានអរគុណដល់ក្រុមហ៊ុន តូយ៉ូតា ដែលបានជ្រើសរើសកម្ពុជាជាទីតាំងសម្រាប់ការបណ្ដាក់ទុនវិនិយោគ និងរៀបចំដំឡើងរោងចក្រ៕