ភ្នំពេញ៖ ឯកឧត្តម ម៉ៅ ធនិន អភិបាលខេត្តកំពត បានប្រកាសដល់សាធារណជន និងភ្ញៀវទេសចរដែលទៅលេងកម្សាន្តនៅខេត្តកំពត ក្នុងករណីមានកន្លែងស្នាក់នៅ កន្លែងលក់ម្ហូបអាហារក្នុងខេត្តកំពតមានការដំឡើងថ្លៃ ដែលលោកអ្នកយល់ថាមិនសមស្រប អាចថតឈ្មោះទីតាំងនិងតម្លៃនោះ ចូលទៅទំព័រហ្វេសប៊ុក របស់ឯកឧត្តមផ្ទាល់ ឬរដ្ឋបាលខេត្ត ដើម្បីត្រួតពិនិត្យជូនភ្លាមៗ។

រដ្ឋបាលខេត្តកំពត បានឱ្យដឹងថា មន្ទីរទេសចរណ៍ខេត្ត ដែលជាសេនាធិការផ្ទាល់ បានប្រមូលបញ្ជីរាយមុខម្ហូបសេវាកម្មទេសចរណ៍គ្រប់ប្រភេទទូទាំងខេត្តកំពត មកតម្កល់នៅមន្ទីរទេសចរណ៍ខេត្ត និងរដ្ឋបាលខេត្តដើម្បីរក្សាទុកត្រួតពិនិត្យក្នុងករណីមានភាពមិនប្រក្រតីទៅលើតម្លៃនៃការស្នាក់នៅហូបចុក មិនថាថ្ងៃមានពិធីបុណ្យទាន ឬថ្ងៃធម្មតា។

ទន្ទឹមនឹងនេះ ឯកឧត្តមអភិបាលខេត្តកំពត ក៏បានអំពាវនាវដល់អាជីវករ អ្នកប្រកបរបរលក់ម្ហូបអាហារ និងកន្លែងស្នាក់នៅ ចូលរួមរក្សាតម្លៃដើមឱ្យបានគ្រប់ៗគ្នាផងដែរ។ ការអំពាវនាវតាមរយៈទំព័រហ្វេសប៊ុករបស់រដ្ឋបាលខេត្តកំពត នាថ្ងៃទី០៤ ខែតុលា ឆ្នាំ២០២៤នេះ ក្រោយពេលដែលកំពុងមានករណីអាជីវកម្ម និងភ្ញៀវទេសចរនិយាយអំពីការឡើងថ្លៃម្ហូបអាហារច្រើនហួសនៅខេត្តកែបកាលពីពេលថ្មីៗនេះ៕