ភ្នំពេញ៖ សម្តេច មហាមន្ត្រី គុយ សុផល ឧបនាយករដ្ឋមន្ត្រី និងជារដ្ឋមន្ត្រីក្រសួងព្រះបរមរាជវាំង បានផ្ញើលិខិតថ្លែងអំណរគុណជូន ឯកឧត្តមសាស្រ្តាចារ្យ បណ្ឌិត អ៊ឹម បុរិន្ទ ទីប្រឹក្សាអមគណៈគម្មាធិការជាតិរៀបចំបុណ្យជាតិ-អន្តរជាតិ និងជានាយកគណៈកម្មការស្រាវជ្រាវវិជ្ជាហោរាសាស្រ្ត និងប្រពៃណីទំនៀមទម្លាប់ខ្មែរ ដែលឯកឧត្តមសាស្រ្តាចារ្យ បណ្ឌិត បានផ្ញើលិខិតជូនពរ និងអបអរសាទសម្តេច មហាមន្ត្រី នាថ្ងៃទី១៣ ខែកញ្ញា ឆ្នាំ២០២៤នេះ។

ក្នុងលិខិតថ្លែងអំណរគុណរបស់សម្តេច មហាមន្ត្រី ជូនចំពោះ ឯកឧត្តមសាស្រ្តាចារ្យ បណ្ឌិត អ៊ឹម បុរិន្ទ បានសរសេរយ៉ាងដូច្នេះថា៖«ខ្ញុំមានសេចក្តីរំភើបរីករាយឥតឧបមា ដោយបានទទួលលិខិតជូនពរ ដែលមានអត្ថន័យដ៏ជ្រាលជ្រៅអំពី ឯកឧត្តមសាស្រ្តាចារ្យបណ្ឌិត ក្នុងឱកាសដែល ព្រះករុណាជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឫទ័យប្រោសព្រះរាជទានគោរមងារដល់ខ្ញុំ ជា សម្តេច មហាមន្ត្រី និងប្រោសព្រះរាជទានតែងតាំងមុខតំណែងជា ឧបនាយករដ្ឋមន្ត្រី និងជា រដ្ឋមន្ត្រីក្រសួងព្រះបរមរាជវាំង»។

សម្តេច មហាមន្ត្រី គុយ សុផល បានថ្លែងអំណរគុណ និងជូនពរជ័យ បវរសួស្តី សិរីមង្គល វិបុលសុខគ្រប់ប្រការ ដល់ឯកឧត្តមសាស្រ្តាចារ្យ បណ្ឌិត អ៊ឹម បុរិន្ទ និងលោកជំទាវ ព្រមទាំងក្រុមគ្រួសារ បានប្រកបតែនឹងសេចក្តីសុខ សេចក្តីចម្រើនគ្រប់ប្រការ៕