ភ្នំពេញ៖ រដ្ឋបាលព្រៃឈើនៃក្រសួងកសិកម្ម រុក្ខាប្រមាញ់ និងនេសាទ បានដាក់លេខទំនាក់ទំនង Hotline គឺ០៨៥៧៨០៨៤៧ ឬ ០១០៥៥៦៦៣០ សម្រាប់ប្រជាពលរដ្ឋប្តឹង ឬរាយការណ៍ករណីមានសត្វស្វា បង្កការរំខាន និងធ្វើទុក្ខបុកម្នេញ ឬបង្កបញ្ហាជាយថាហេតុនៅទូទាំងប្រទេស។ នេះបើតាមការចុះផ្សាយរបស់ក្រសួងកសិកម្ម កាលពីថ្ងៃទី២១ ខែសីហា ឆ្នាំ២០២៤។

រដ្ឋបាលព្រៃឈើ នឹងចេញអន្តរាគមន៍ដកហូតសត្វស្វា ដែលបង្កគ្រោះថ្នាក់ទាំងនោះចេញពីតំបន់សាធារណៈ។ ចំពោះ សត្វស្វាដែលចាប់បាន នឹងត្រូវយកទៅព្រលែងក្នុងព្រៃធម្មជាតិ ដើម្បីបង្កើនចំនួនសត្វស្វាដោយធម្មជាតិ ឬយកទុកធ្វើជាមេបង្កាត់ពូជនៅក្នុងកសិដ្ឋាន ឬរក្សាទុកនៅតាមសួនសត្វ អាស្រ័យទៅតាមស្ថានភាពនៃសត្វស្វានីមួយៗ។

រដ្ឋបាលព្រៃឈើ បានអំពាវនាវឱ្យប្រជាពលរដ្ឋកុំព្រលែងស្វានៅតាមវត្តអារាម ឬទីសាធារណៈ និងកុំផ្តល់ចំណី កុំប៉ះពាល់ ឬលេងជាមួយសត្វស្វា និងត្រូវរក្សាគម្លាតឆ្ងាយពីស្វានៅវត្តអារាម ឬទីសាធារណៈ ដើម្បីធានាសុវត្ថិភាព បញ្ចៀសការបង្កគ្រោះថ្នាក់ណាមួយដោយសត្វស្វាទាំងនេះ ក៏ដូចជាកាត់បន្ថយហានិភ័យនៃការចម្លងជំងឺ៕