ភ្នំពេញ៖ ធនាគារជាតិនៃកម្ពុជា និងធនាគារកណ្តាលហ្វីលីពីន Bangko Sentral ng Pilipinas បានចុះអនុស្សរណៈយោគយល់(MOU) ស្តីពីការពង្រឹងកិច្ចសហប្រតិបត្តិការរវាងធនាគារកណ្តាលទាំងពីរ តាមរយៈការតភ្ជាប់និងនវានុវត្តន៍ប្រព័ន្ធទូទាត់ នវានុវត្តន៍ហិរញ្ញវត្ថុឌីចីថល។ នេះបើតាមការចុះផ្សាយរបស់ធនាគារជាតិនៃកម្ពុជា នាថ្ងៃទី១៩ ខែសីហា ឆ្នាំ២០២៤។

ចុះ MOU នេះ ត្រូវបានចុះហត្ថលេខាដោយ លោកជំទាវបណ្ឌិត ជា សិរី ទេសាភិបាលធនាគារជាតិ និង ឯកឧត្តម Eli M. Remolona, Jr. ទេសាភិបាលធនាគារកណ្តាលហ្វីលីពីន Bangko Sentral ng Pilipinas កាលពីថ្ងៃទី១៩ ខែសីហា ក្នុងកិច្ចប្រជុំទ្វេភាគីកម្រិតខ្ពស់ នៅខេត្តសៀមរាប។

កិច្ចសហប្រតិបត្តិការទ្វេភាគីរវាងធនាគារកណ្តាលទាំងពីរ គឺដើម្បីត្រួតពិនិត្យប្រព័ន្ធធនាគារ ការអភិវឌ្ឍធនធានមនុស្ស និងផ្នែកផ្សេងៗទៀតសម្រាប់ផលប្រយោជន៍ទៅវិញទៅមក។ គួរបញ្ជាក់ថា លោកជំទាវបណ្ឌិត ជា សិរី និងឯកឧត្តម Eli M. Remolona, Jr. បានឯកភាពបន្តរៀបចំកិច្ចប្រជុំទ្វេភាគីជាប្រចាំឆ្នាំផងដែរ៕