ភ្នំពេញ៖ ការចាប់យកឱកាសធុរកិច្ចនៃឥណទានកាបូននៅកម្ពុជា ដោយប្រើប្រាស់បច្ចេកវិទ្យាបៃតង និងលំហអាកាសទំនើបចុងក្រោយបំផុតរបស់ជប៉ុន នឹងបង្កើនឱកាសអាជីវកម្មថ្មីៗដល់ធុរជនជាតិ-អន្តរជាតិ ក្នុងការបង្កើតប្រភពចំណូល តាមរយៈការលក់ឥណទានកាបូន ពង្រីកអាជីវកម្មតាមរបៀបបៃតង និងនិរន្តរភាព។ នេះបើតាមការចុះផ្សាយរបស់ក្រសួងបរិស្ថាន នាថ្ងៃទី៧ ខែសីហា ឆ្នាំ២០២៤។

ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានលើកឡើងក្នុងសន្និសីទស្តីពីការបង្កើតកិច្ចសហប្រតិបត្តិការរួមគ្នារវាងកម្ពុជា-ជប៉ុន ថា ការនាំមកនូវបច្ចេកវិទ្យាបៃតងរបស់ជប៉ុន ជាកត្តាជំរុញឱ្យមានល្បឿននៃការវិនិយោគវិវឌ្ឍន៍ទៅលឿន និងឆាប់រហ័សនៅកម្ពុជា ប៉ុន្តែក៏ត្រូវគិតដល់ប្រាក់ចំណូល និងផលប្រយោជន៍របស់ប្រជាកសិករផងដែរ។ រដ្ឋមន្រ្តីក្រសួងបរិស្ថាន បានបន្តថា កម្ពុជា ជាផ្ទះដែលពេញដោយស្នាមញញឹម និងឱកាសវិនិយោគជាច្រើនសម្រាប់ធុរជនជាតិ-អន្តរជាតិ។

ក្នុងសន្និសីទដែលធ្វើឡើងក្រោមប្រធានបទ«ចាប់យកឱកាសធុរកិច្ចនៃឥណទានកាបូននៅកម្ពុជា ដោយប្រើប្រាស់បច្ចេកវិទ្យាបៃតង និងលំហអាកាសទំនើបចុងក្រោយបំផុតរបស់ជប៉ុន»នេះ ឯកឧត្តម ឌិត ទីណា ក្រសួងកសិកម្ម រុក្ខាប្រមាញ់ និងនេសាទ បានលើកឡើងថា ក្រសួងកសិកម្ម នឹងជួយគាំទ្រសកម្មភាពបច្ចេកវិទ្យា ដែលងាយស្រួលអនុវត្ត និងរកដំណោះស្រាយទីផ្សារជូនប្រជាកសិករផងដែរ។ នាឱកាសនោះ ឯកឧត្តមបណ្ឌិត អ៊ាង សុផល្លែត ក៏បានស្វាគមន៍វិនិយោគិនជាតិ និងអន្តរជាតិ ដែលមានបំណងជួយឱ្យកម្ពុជា មានភាពស្អាត និងមានបំណងរួមចំណែកធ្វើឱ្យកម្ពុជា មានកំណើនសេដ្ឋកិច្ច និងប្រកបដោយភាពបៃតង ស្អាត និងចីរភាពទៀតផង៕