ភ្នំពេញ៖ ធនាគារជាតិ នៃកម្ពុជា ចុះអនុស្សរណៈយោគយល់ (MOU) ជាមួយធនាគារកណ្តាលនៃប្រទេសម៉ាដាហ្កាស្កា ដើម្បីបង្កើតកិច្ចសហប្រតិបត្តិការរវាងធនាគារកណ្តាលនៃប្រទេសទាំងពីរ។ នេះបើតាមការចុះផ្សាយរបស់ធនាគារជាតិនៃកម្ពុជានៅថ្ងៃទី១៩ ខែកុម្ភៈ ឆ្នាំ២០២៥។

ពិធីចុះMOU នេះ ចុះហត្ថលេខាដោយលោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា និង ឯកឧត្តម Hon. Aivo H. Andrianarivelo ទេសាភិបាល ធនាគារកណ្តាលម៉ាដាហ្កាស្កា។ ជាមួយគ្នានេះ ឯកឧត្តម Hon. Aivo H. Andrianarivelo បានបង្ហាញថា កិច្ចសហប្រតិបត្តិការជាមួយធនាគារជាតិនៃកម្ពុជា នឹងផ្តល់អត្ថប្រយោជន៍ទៅវិញទៅមកទាំងផ្នែកសេដ្ឋកិច្ច និងផ្នែកសង្គម។

លើសពីនេះ លោកជំទាវបណ្ឌិត ជា សិរី ក៏បានបញ្ជាក់ដល់សមភាគីម៉ាដាហ្កាស្កាអំពីវឌ្ឍនភាពការងាររបស់ធនាគារជាតិនៃកម្ពុជា ដែលមានប្រទេសជាច្រើនបានមកសិក្សាស្វែងយល់ពីបទពិសោធលើការអភិវឌ្ឍប្រព័ន្ធបាគង និងការតភ្ជាប់ប្រព័ន្ធទូទាត់ជាមួយប្រទេសនានាជាច្រើន ហើយរំពឹងថានឹងអាចតភ្ជាប់ប្រព័ន្ធទូទាត់ឆ្លងដែនជាមួយម៉ាដាហ្កាស្កា នាពេលខាងមុខផងដែរ៕