ភ្នំពេញ៖ កម្ពុជា ទទួលបានភ្ញៀវទេសចរអន្តរជាតិសរុបប្រមាណ ២,៦៤០,៩៩៩នាក់ ក្នុងរយៈពេល ៥ខែ គឺចាប់ពីខែមករា ដល់ខែឧសភា ឆ្នាំ២០២៤។ បើតាមការចុះផ្សាយរបស់ក្រសួងទេសចរណ៍ កាលពីថ្ងៃទី១១ ខែកក្កដា ឆ្នាំ២០២៤ ចំនួននេះ បានកើនឡើង២២,១% បើធៀបនឹងរយៈពេល ៥ខែក្នុងឆ្នាំ២០២៣។

ក្នុងចំណោមភ្ញៀវបរទេសជាង២លាន ៦សែននាក់នេះ ភ្ញៀវទេសចរធ្វើដំណើរតាមផ្លូវអាកាសមានប្រមាណ ៩៨៦,៤៣៥នាក់ ផ្លូវគោកប្រមាណ ១,៦១២,៥៤៧នាក់ និងផ្លូវទឹកប្រមាណ ៤២,០១៧នាក់។ ចំណែកភ្ញៀវទេសចរផ្ទៃក្នុងដែលគិតត្រឹមរយៈពេល ៥ខែ នៃឆ្នាំ២០២៤នេះវិញ មានប្រមាណ១០,៦៨៨,០៧៣នាក់ ក្នុងនោះភ្ញៀវទេសចរបរទេសមានប្រមាណ ១,៩០៦,៨០០នាក់ កើនឡើង៦៩,១% ប្រៀបធៀបនឹងរយៈពេលដូចគ្នា ក្នុងឆ្នាំ២០២៣។

ក្រសួងទេសចរណ៍ បានបញ្ជាក់ថា ភ្ញៀវទេសចរផ្ទៃក្នុងជាង ១០លាននាក់នេះ បានទៅទស្សនានៅគោលដៅទេសចរណ៍មួយចំនួនដូចជា៖ រាជធានីភ្នំពេញ មានភ្ញៀវទេសចរចំនួន ១,០៩០,៤៣៤នាក់, ខេត្តសៀមរាប មានប្រមាណ ៤៧២,២៥៨នាក់, តំបន់ឆ្នេរមានប្រមាណ ២៤១,២៧៣នាក់, តំបន់អេកូទេសចរណ៍មានចំនួន ១៨,៧៩៨នាក់ និងតំបន់ផ្សេងៗទៀតប្រមាណ ៨៤,០៥៣នាក់។

គួរជម្រាបថា ភ្ញៀវទេសចរអន្តរជាតិដែលធ្វើដំណើរមកកាន់ប្រទេសកម្ពុជាច្រើនជាងគេ រួមមាន ប្រទេសថៃ ប្រទេសវៀតណាម ប្រទេសចិន ប្រទេសឡាវ សហរដ្ឋអាម៉េរិក ប្រទេសកូរ៉េខាងត្បូង ប្រទេសឥណ្ឌូណេស៊ី ប្រទេសបារាំង ចក្រភពអង់គ្លេស និងប្រទេសជប៉ុន៕