ភ្នំពេញ៖ ឆមាសទី១ នៃឆ្នាំ២០២៤ កម្ពុជា សម្រេចបានទំហំពាណិជ្ជកម្មជាង ២៦,០៩ពាន់លានដុល្លារ កើនឡើង ១២,៧% បើធៀបនឹងរយៈពេលដូចគ្នាក្នុងឆ្នាំ២០២៣ ដែលមានទំហំពាណិជ្ជកម្មជាង ២៣,១៥ពាន់លានដុល្លារ។ នេះបើតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា ចេញផ្សាយនាថ្ងៃទី១០ ខែកក្កដា ឆ្នាំ២០២៤។

ទំហំពាណិជ្ជកម្មដែលកម្ពុជាសម្រេចបានជាង ២៦,០៩ពាន់លានដុល្លារនេះ ក្នុងនោះការនាំចេញទំនិញទៅកាន់ទីផ្សារអន្តរជាតិ កម្ពុជាសម្រេចបានជាង ១២,២៩ពាន់លានដុល្លារ ដែលកើនឡើង១២,៦% ខណៈដែលទំនិញដែលកម្ពុជានាំចូល មានទំហំជាង ១៣,៧៩ពាន់លានដុល្លារ កើនឡើងជិត១៣% បើធៀបនឹងរយៈពេល ៦ខែក្នុងឆ្នាំ២០២៣។

អគ្គនាយកដ្ឋានគយ និងរដ្ឋាករកម្ពុជា បានឱ្យដឹងថា ប្រទេសដែលកម្ពុជាសម្រេចការនាំចេញ និងនាំចូលបានច្រើនជាងគេ រួមមាន៖ ប្រទេសចិន សម្រេចបាន ៧,៣១ពាន់លានដុល្លារ, សហរដ្ឋអាម៉េរិក សម្រេចបានទំហំ ៤,៥២ពាន់លានដុល្លារ, ប្រទេសវៀតណាម សម្រេចបាន ៤,០៤ពាន់លានដុល្លារ, ប្រទេសថៃ កម្ពុជាសម្រេចបាន ២,០៥ពាន់លានដុល្លារ និងប្រទេសជាច្រើនផ្សេងទៀត។

គួរបញ្ជាក់ថា ទំនិញដែលកម្ពុជា នាំចេញមានដូចជា សម្លៀកបំពាក់ គ្រឿងបន្ទាប់បន្សំដែលធ្វើពីក្រណាត់ ធញ្ញជាតិ ឈើ និងវត្ថុធ្វើពីឈើ ធ្យូងឈើ បន្លែដែលអាចបរិភោគបាន ស្បែកជើង ស្រោមជើង និងផលិតផលផ្សេងៗទៀត។ ចំណែក ទំនិញ ដែលកម្ពុជានាំចូល រួមមាន៖ រ៉ែប្រើជាគ្រឿងចំហេះ ប្រេងខនិជ ផលិតផលពីការចម្រាញ់ ផលិតផលពីការចាក់ដោយម្ជុល កប្បាស ដែក និងផលិតផលមួយចំនួនផ្សេងទៀត៕