ភ្នំពេញ៖ រយៈពេល ៦ខែក្នុងឆ្នាំ២០២៤ កម្ពុជា ទទួលបានចំណូលពីការលក់បណ្ណចូលទស្សនារមណីយដ្ឋានអង្គរ ប្រាសាទកោះកែ និងកំពង់ផែចុងឃ្លៀសជាង ២៤,៣៥លានដុល្លារ កើន ៣៦,២៥% បើធៀបនឹងរយៈពេលដូចគ្នាក្នុងឆ្នាំ២០២៣។ តាមការចុះផ្សាយរបស់គ្រឹះស្ថានអង្គរ នាថ្ងៃទី០១ កក្កដានេះ ភ្ញៀវទេសចរដែលទិញបណ្ណចូលទស្សនារមណីយដ្ឋានអង្គរ ប្រាសាទកោះកែ និងកំពង់ផែចុងឃ្លៀសមានចំនួន ៥២១ ៩៥០នាក់។

តាមសេចក្តីប្រកាសព័ត៌មានរបស់គ្រឹះស្ថានអង្គរ ក្នុងរយៈពេល ៦ខែនេះ ចំណូលពីការលក់បណ្ណចូលប្រាសាទកោះកែវមានចំនួន ១៦២ ៤២០ ដុល្លារ និងទទួលបានភ្ញៀវទេសចរចំនួន ១០ ៨២៨នាក់។ រីឯចំណូលពីការលក់សំបុត្រទូកមានទំហំ ៤៣២ ៨៨១ដុល្លារ ដែលក្នុងនោះមានទូកតូចចំនួន ១០ ៧៧៥, ទូកកណ្តាលចំនួន ៤ ៣៨២ និងទូកធំ ៥៥៤។

ចំពោះ ចំណូលឧបត្ថម្ភមូលនិធិគន្ធបុប្ផាកម្ពុជាក្នុងរយៈពេល ០៦ខែនៃឆ្នាំ២០២៤ នេះ មានចំនួន ១ ០៤៣ ៩០០ដុល្លារ។ គួរជម្រាបថា ក្នុងខែមិថុនា ឆ្នាំ២០២៤នេះ កម្ពុជា រកចំណូលពីការលក់បណ្ណចូលទស្សនារមណីយដ្ឋានអង្គរ ប្រាសាទកោះកែ និងកំពង់ផែចុងឃ្លៀសបាន ២ ១៥០ ៨០៤ដុល្លារ ដែលកើនឡើងជិត១៩% និងទទួលបានភ្ញៀវបរទេសចូលទស្សនាចំនួន ៤៩ ៦៩២នាក់ មានការកើនឡើង ២១,១៦% បើធៀបនឹងខែមិថុនា ឆ្នាំ២០២៣៕