ភ្នំពេញ៖ ក្រុមហ៊ុន Hung Hua Corporation របស់ប្រទេសវៀតណាម កំពុងសិក្សាជ្រើសរើសទីតាំងពង្រីកការវិនិយោគក្នុងវិស័យកែច្នៃកសិផលនិងចំណីអាហារនៅកម្ពុជា។ ក្រុមហ៊ុនមួយនេះ កំពុងសម្លឹងឃើញពីសក្តានុពលផលិតផលកសិកម្មរបស់កម្ពុជា ពិសេសស្វាយចន្ទី ស្វាយកែវរមៀត និងដំណាំកសិផលផ្សេងៗទៀត បើតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា (CDC)។

ការជ្រើសរើសទីតាំងពង្រីកការវិនិយោគនៅកម្ពុជានេះ ធ្វើឡើងស្របតាមអនុស្សារណៈយោគយល់គ្នារវាងក្រុមហ៊ុន Rithy Granith Cambodia Co., Ltd. និងក្រុមហ៊ុន Hung Hua Corporation ដែលបានចុះហត្ថលេខាក្នុងអំឡុងដំណើរទស្សនកិច្ចរបស់ សម្តេចធិបតីនាយករដ្ឋមន្ត្រី នៅប្រទេសវៀតណាម។ ក្នុងដំណើរផ្សព្វផ្សាយ និងទាក់ទាញការវិនិយោគលើវិស័យកសិ-ឧស្សាហកម្មកម្ពុជា នៅវៀតណាម កាលពីថ្ងៃទី៨ ខែមិថុនា ឆ្នាំ២០២៤ ឯកឧត្តម ជា វុទ្ធី ក៏បានទស្សនកិច្ចរោងចក្ររបស់ក្រុមហ៊ុន Hung Hua Group ដែលមានសកម្មភាពផលិតនិងកែច្នៃផលិតផលគ្រាប់ស្វាយចន្ទី ស្វាយ ចេក ឱឡឹក និងចំណីអាហារផ្សេងៗ ដែលជាតម្រូវការខ្ពស់នៅលើទីផ្សារចំណីអាហារ។

ក្រុមហ៊ុន Hung Hua ជាក្រុមហ៊ុនដែលមានអាយុកាលវិនិយោគប្រមាណ ៥០ឆ្នាំ និងមានការទទួលស្គាល់គុណភាពជាអន្តរជាតិ លើផលិតផលចំណីអាហារ ដោយផ្តោតលើមុខសញ្ញាអាទិភាព ដូចជា បង្គា ត្រី កាហ្វេ ស្វាយចន្ទី បន្លែនិងផ្លែឈើ។ ក្រុមហ៊ុនមួយនេះ បានឈានមុខគេលើការផ្គត់ផ្គង់ទីផ្សារ នៅសហរដ្ឋអាម៉េរិក អឺរ៉ុប ជប៉ុន កូរ៉េ អូស្ត្រាលី ប្រទេសនៅមជ្ឈឹមបូព៌ា និងបណ្តាប្រទេសផ្សេងៗទៀតនៅអាស៊ី៕