ភ្នំពេញ៖ សម្តេចតេជោ ហ៊ុន សែន ប្រធានព្រឹទ្ធសភា បានជំរុញឱ្យឥណ្ឌូណេស៊ី ពិចារណាក្នុងការវិនិយោគដោយផ្ទាល់នៅប្រទេសកម្ពុជាលើវិស័យសន្តិសុខស្បៀង ដែលមានការរៀបចំជាប្រព័ន្ធផលិត ស្តុកទុក កិន ហើយអាចវេចខ្ចប់ ដើម្បីនាំចេញទៅកាន់ឥណ្ឌូណេស៊ី ឬបណ្ដាប្រទេសផ្សេងៗទៀត។ សម្តេចតេជោ ហ៊ុន សែន ជំរុញបែបនេះនៅក្នុងជំនួបពិភាក្សាជាមួយឯកឧត្ដម សាន់តូ ដាម៉ូស៊ូម៉ាតូ ឯកអគ្គរដ្ឋទូតឥណ្ឌូណេស៊ីប្រចាំកម្ពុជា។

ក្នុងជំនួបនេះ សម្តេចតេជោ ហ៊ុន សែន បានលើកឡើងថា ឥណ្ឌូណេស៊ី គួរតែចាប់យកវិស័យកសិកម្មរបស់កម្ពុជាជាស្នូល ព្រោះកម្ពុជាមានសន្តិសុខស្បៀង ដែលនៅសល់ស្រូវច្រើន ហើយឥណ្ឌូណេស៊ី មានប្រជាជនច្រើនត្រូវការស្បៀង ពិសេសកម្ពុជា ជាទីកន្លែងដែលអាចផ្គត់ផ្គង់ស្បៀងប្រកបដោយស្ថិរភាពផងដែរ។ សម្តេចតេជោប្រធានព្រឹទ្ធសភា បានបន្ថែមថា ការវិនិយោគដោយត្រង់នេះ នឹងផ្តល់ផលប្រយោជន៍បំពេញឱ្យគ្នាទៅវិញទៅមករវាងប្រទេសទាំងពីរ និងជួយឱ្យកសិករកម្ពុជាមានទីផ្សារ ហើយឥណ្ឌូណេស៊ីមានប្រភពធានានូវសន្តិសុខស្បៀងរយៈពេលយូរអង្វែង។

តាមការចុះផ្សាយរបស់សម្តេចតេជោ ហ៊ុន សែន នាថ្ងៃទី៥ ខែមិថុនា ឆ្នាំ២០២៤ ឯកឧត្តម សាន់តូ ដាម៉ូស៊ូម៉ាតូ ក៏បានលើកឡើងថា វិស័យកសិកម្មនៅឆ្នាំ២០២៣ របស់ប្រទេសឥណ្ឌូណេស៊ី បានចាប់ផ្ដើមនាំចូលស្រូវអង្ករពីកម្ពុជាមកឥណ្ឌូណេស៊ី។ ឯកឧត្តម សាន់តូ ដាម៉ូស៊ូម៉ាតូ បានបញ្ជាក់ថា ឥណ្ឌូណេស៊ី ក៏មានការចាប់អារម្មណ៍លើការវិនិយោគផលិតស្រូវនៅកម្ពុជាតែម្ដងផងដែរ៕