ភ្នំពេញ៖ កម្ពុជា នឹងគោះទ្វារវិនិយោគនៅសហភាពអឺរ៉ុបក្នុងខែមិថុនា ដើម្បីបង្ហាញពីសក្តានុពលវិនិយោគនៅកម្ពុជា ដល់វិនិយោគិននៅប្រទេសក្នុងសហភាពអឺរ៉ុបចំនួន២ គឺប្រទេសអាល្លឺម៉ង់ និងប្រទេសអេស្ប៉ាញ ដែលស្របតាមការឯកភាពរួមគ្នាកាលពីកិច្ចប្រជុំថ្ងៃទី១១ ខែមីនា ឆ្នាំ២០២៤។ នេះបើតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា នាថ្ងៃទី២៩ ឧសភា។

ក្នុងកិច្ចពិភាក្សាអំពីគម្រោងគោះទ្វារវិនិយោគនៅសហភាពអឺរ៉ុប ឯកឧត្តម ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានលើកឡើងថា កម្ពុជា កំពុងជំរុញការប្រើប្រាស់ «យុទ្ធសាស្ត្រប្រទេសបូក» (Plus-One Strategy) ដើម្បីបង្កើនភាពចម្រុះនៃក្រុមហ៊ុនវិនិយោគនៅកម្ពុជា ពិសេសការវិនិយោគផ្ទាល់ពីបរទេសលើវិស័យឧស្សាហកម្មថ្មីៗ ដូចជា គ្រឿងអេឡិកត្រូនិក យានយន្ត គ្រឿងបង្គុំ និងការកែច្នៃម្ហូបអាហារ។

ក្នុងកិច្ចពិភាក្សាជាមួយ ឯកឧត្ដម Igor Driesmans ឯកអគ្គរដ្ឋទូតវិសាមញ្ញនិងពេញសមត្ថភាពនៃសហភាពអឺរ៉ុប ឯកឧត្តម ស៊ុន ចាន់ថុល បានបន្តថា កម្ពុជា បានត្រៀមខ្លួនរួចជាស្រេច ក្នុងការធ្វើពិពិធកម្មវិនិយោគ ដើម្បីទាក់ទាញវិនិយោគិនពីគ្រប់បណ្ដាប្រទេស និងបណ្ដាក្រុមហ៊ុនមានសក្ដានុពលនានានៅសហភាពអឺរ៉ុប៕