ភ្នំពេញ៖ កម្ពុជា ឈរលើលេខរៀងទី១ ដែលមានកន្លែងសម្រាប់មើលថ្ងៃរះស្អាតជាងគេក្នុងចំណោមប្រទេសចំនួន ៧២ នៅលើពិភពលោក។ នេះបើតាមការប្រមូលទិន្នន័យនៃការស្វែងរកទីតាំងថ្ងៃរះស្អាតបំផុតជុំវិញពិភពលោករបស់ Mornings.co.uk។

តាមការប្រមូលទិន្នន័យខាងលើ បានបញ្ជាក់ថា ប្រាសាទអង្គរវត្ត របស់កម្ពុជាបានឈរនៅលំដាប់ថ្នាក់លេខ១ ជាកន្លែងមើលថ្ងៃរះស្អាតបំផុត។ ចំពោះ កន្លែងដែលមើលថ្ងៃរះស្អាតបន្ទាប់ពីកម្ពុជា គឺប្រាសាទ Borobudur ប្រទេសឥណ្ឌូនេស៊ី ដែលជាប់ចំណាត់ថ្នាក់ទី៤ ខណៈដែលឧទ្យានជាតិ Murchison Falls របស់ប្រទេសអ៊ូហ្គាន់ដា ឈរនៅលំដាប់លេខរៀងចុងក្រោយគេ គឺលេខរៀងទី៧២។

តាម Mornings.co.uk បានឱ្យដឹងថា ប្រាសាទអង្គរវត្តរបស់ប្រទេសកម្ពុជា ត្រូវបានប្រជាជនលើកឡើងមកច្រើនជាងគេចំនួន ១០ ៤០៤ នាក់។ គួរជម្រាបថា កាលថ្ងៃទី២១ ខែមីនា ឆ្នាំ២០២៤ មានភ្ញៀវទេសចរចូលមកទស្សនាថ្ងៃរះចំកំពូលកណ្តាលនៅប្រាសាទអង្គរវត្ត នៃខេត្តសៀមរាប ចំនួន១០ ១៥៤នាក់ ដែលក្នុងនោះ មានភ្ញៀវអន្តរជាតិចំនួន ២ ៥៧៥នាក់ និងភ្ញៀវជាតិចំនួន ៧ ៥៧៩នាក់៕