ភ្នំពេញ៖ មន្ត្រីជំនាញគយចល័តតំបន់១ ប្រចាំរាជធានីភ្នំពេញ បានរកឃើញ និងដុតបំផ្លាញចោលប្រហិតចម្រុះចំនួន ៨០កេស និង១៦២ការ៉ុង ដែលស្មើនឹង ៨,៦២០គីឡូក្រាម នៅមណ្ឌលឃ្លាំងគយ ភូមិសាស្ត្រខណ្ឌព្រែកព្នៅ រាជធានីភ្នំពេញ។ នេះបើតាមការចុះផ្សាយរបស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ (អគ្គនាយកដ្ឋាន ក.ប.ប.) នាថ្ងៃទី២៥ ខែមេសា ឆ្នាំ២០២៤។

អគ្គនាយកដ្ឋាន ក.ប.ប. បានបញ្ជាក់ថា ប្រហិតចម្រុះចំនួន៨០កេស និង១៦២ការ៉ុង ដែលបានឃាត់ទុក និងដុតចោល រួមមាន៖ ហតដក ប្រហិតត្រីបន្ទះ ប្រហិតសាច់មឹក ប្រហិតសាច់មាន់ ប្រហិតដង្កៀបក្តាម ដោយឈ្មួញលួចនាំចូលដឹកតាមរថយន្តស៊ាំយ៉ុងចំនួន២គ្រឿង។

អគ្គនាយកដ្ឋាន ក.ប.ប. បានបន្ថែមថា ទំនិញប្រហិតចម្រុះទាំងនោះ ត្រូវបានឈ្មួញទុច្ចរិត លួចបន្លំនាំចូលដោយពុំមានឯកសារ ដើម្បីបំពេញភាពអនុលោម គ្មានប្រភពច្បាស់លាស់ ការវេចខ្ចប់ និងដឹកជញ្ជូនមិនត្រឹមត្រូវស្របតាមបទប្បញ្ញត្តិបច្ចេកទេស ដែលនាំឱ្យទំនិញប្រហិតទាំងនោះបាត់បង់គុណភាព។ តាមលទ្ធផលនៃការត្រួតពិនិត្យនេះ មន្ត្រីជំនាញបានសម្រេចដកហូតយកទៅបំផ្លាញចោលតាមនីតិវិធី នូវទំនិញប្រហិតចម្រុះទាំងនោះ ដើម្បីកុំឱ្យមានការចរាចរចូលទីផ្សារ ដែលអាចបណ្តាលឱ្យប៉ះពាល់ដល់សុខភាពរបស់អ្នកប្រើប្រាស់ជាយថាហេតុ៕