ភ្នំពេញ៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ រួមជាមួយក្រសួងពាណិជ្ជកម្ម និងក្រសួងសេដ្ឋកិច្ច និងហិរញ្ញវត្ថុ បានរៀបចំកិច្ចប្រជុំពិភាក្សារកដំណោះស្រាយ ដើម្បីសម្រួលការចុះបញ្ជីសហគ្រាសធុនមីក្រូ តូច និងមធ្យម (SMEs) លើថ្នាលឌីជីថលរួមតែមួយ។

ក្នុងកិច្ចប្រជុំនេះ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម និងលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានធ្វើជាសហប្រធានដឹកនាំកិច្ចប្រជុំ ដើម្បីកំណត់វិធានការគោលនយោបាយ សំដៅដោះស្រាយកង្វល់អ្នកចុះបញ្ជី, និយមន័យប្រភេទសហគ្រាស និងអភិក្រមនៃការអនុវត្ត។ ការផ្តល់លទ្ធភាពឱ្យសហគ្រាសធុនមីក្រូ តូច និងមធ្យម ចូលរួមបានកាន់តែពេញលេញក្នុងប្រព័ន្ធផ្លូវការគឺជាគន្លឹះនៃការពង្រឹង និងពង្រីកមូលដ្ឋានគ្រឹះនៃសេដ្ឋកិច្ចជាតិ៕