ភ្នំពេញ៖ ថ្ងៃនេះរោងម៉ាស៊ីនដៃគូជាមួយក្រសួងកសិកម្មចំនួន២៧ នឹងប្រមូលទិញស្រូវពីបងប្អូនកសិករនៅទូទាំងប្រទេសចំនួនប្រមាណ១៤០០០តោនបន្ថែមទៀត បន្ទាប់ពីបានប្រមូលទិញជិត១ម៉ឺនតោន នៅពីថ្ងៃទី៧ វិច្ឆិកា ម្សិលមិញ។ នេះបើតាមការបញ្ជាក់របស់ក្រសួងកសិកម្ម។

បន្ទាប់ពីបរិមាណស្រូវសើមជិត១ម៉ឺនតោន ត្រូវបានរោងម៉ាស៊ីន ដៃគូជាមួយក្រសួងកសិកម្ម សម្រុកប្រមូលទិញពីបងប្អូនកសិករនៅទូទាំងប្រទេសកាលពីថ្ងៃទី៧ វិច្ឆិកា ២០២៥ នេះ ក្រសួងកសិកម្ម អះអាងការប្រមូលទិញស្រូវពីប្រជាកសិករ រំពឹងទុកថានឹងហក់ឡើងខ្ពស់ខ្លាំងនៅក្នុងខែវិច្ឆិកានេះ ដែលជាខែប្រមូលផលធំក្នុងរដូវកាលនេះ លើផ្ទៃដីដាំដុះប្រហែល១,៥លានហិកតា ជាមួយនឹងបរិមាណផលចន្លោះពី៤-៥លានតោនស្រូវសើម។

ក្រសួងកសិកម្ម អះអាងទៀតថាប៉ុន្មានខែកន្លងមកនេះ តាមរយៈមន្ត្រីកសិកម្មឃុំនិងរោងម៉ាស៊ីនដៃគូទាំងអស់របស់ ក្រសួងកសិកម្មនិងសហព័ន្ធស្រូវអង្ករបានធ្វើការជាមួយគ្នាយ៉ាងជិតស្និទ្ធស្ទើរតែរៀងរាល់ថ្ងៃជាមួយនឹងវិសាលភាពដ៏ធំធេង ដើម្បីធានាឱ្យបានថាការប្រមូលទិញស្រូវពីបងប្អូនកសិករ នៅតាមទីវាលនៅតែមានលំហូរជាប់ជាប្រចាំ និងជួយមិនឱ្យកសិករកកស្ទះរហូតដល់ខូចស្រូវនោះឡើយ៕