ភ្នំពេញ៖ ក្រសួងពាណិជ្ជកម្ម នៅថ្ងៃទី១១ មីនា ឆ្នាំ២០២៤នេះ ប្រកាសដាក់ឱ្យដំណើរការជាផ្លូវការនូវប្រព័ន្ធទូរស័ព្ទសាធារណៈរបស់ក្រសួងពាណិជ្ជកម្ម ដែលមានលេខ ១២៦៦ ដើម្បីឆ្លើយតបនូវសំណួរ សំណូមពរ មតិយោបល់ និងដំណោះស្រាយបញ្ហាប្រឈមនានា ដោយហៅចូលមកកាន់មន្ត្រីជំនាញរបស់ក្រសួងដោយឥតគិតថ្លៃ។

សំណួរ សំណូមពរ មតិយោបល់ និងដំណោះស្រាយបញ្ហាប្រឈមនានា របស់ធុរជន និងសាធារណជន ដែលក្រសួងពាណិជ្ជកម្មនឹងឆ្លើយតបនោះពាក់ព័ន្ធនឹងព័ត៌មានទូទៅ, ព័ត៌មានអំពីការចុះបញ្ជីពាណិជ្ជកម្ម, ព័ត៌មានអំពីការចុះបញ្ជីម៉ាក, ព័ត៌មានអំពីការនាំចេញ-នាំចូល, ព័ត៌មានអំពីការការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.), ព័ត៌មានអំពីសេវាពាណិជ្ជកម្មផ្សេងៗរបស់ក្រសួងពាណិជ្ជកម្ម ដូចជាប្រតិបត្តិការដែលមានកិច្ចធានា និងព័ត៌មានអំពីការតាំងពិព័រណ៍។

ការដាក់ឱ្យដំណើរការលេខទំនាក់ទំនង ដោះស្រាយចម្ងល់ទាំងនោះ ក្រសួងពាណិជ្ជកម្ម បានបញ្ជាក់ថា សម្រាប់ប្រើប្រាស់ជាប្រយោជន៍ ព្រមទាំងដើម្បីជួយសម្រួលដល់ការប្រកបអាជីវកម្ម និងធុរកិច្ចកាន់តែមានភាពងាយស្រួល និងរីកចម្រើនបន្ថែមទៀត។ ធុរជន និងសាធារណជនទូទៅ ដែលមានបំណងសាកសួរ ព័ត៌មាន ចម្ងល់ ឬបញ្ហាផ្សេងៗពាក់ព័ន្ធ អាចហៅចូលមកកាន់លេខទូរស័ព្ទ ១២៦៦ ដោយឥតគិតថ្លៃ ដោយមានមន្ត្រីជំនាញរបស់ក្រសួងពាណិជ្ជកម្ម រង់ចាំទទួលទូរស័ព្ទ និងធ្វើការឆ្លើយតប នៅរៀងរាល់ម៉ោងធ្វើការ៕