ភ្នំពេញ៖ ក្រុមហ៊ុនអ៊ែមភល - អាហ្គ្រោ ប្រដាក់ ឯ.ក AMPLE AGRO PRODUCTS សម្រេចបានការនាំចេញផលិតផលស្វាយចន្ទីកែច្នៃលើកដំបូង ទៅកាន់ប្រទេសអ៊ីតាលី នៃសហគមន៍អ៊ីរ៉ុប ដែលការនាំចេញនេះ ជាជំហានយ៉ាងសំខាន់ ក្នុងការចូលរួមអនុវត្តគោលនយោបាយជាតិស្តីពីស្វាយចន្ទីឆ្នាំ២០២២-២០២៧ របស់កម្ពុជា។

ក្នុងពិធីសម្ពោធជាផ្លូវការ «ការនាំចេញផលិតផលស្វាយចន្ទីកែច្នៃជាកុងតឺន័រលើកដំបូង ទៅកាន់ប្រទេសអ៊ីតាលី នៃសហគមន៍អឺរ៉ុប របស់ក្រុមហ៊ុន AMPLE AGRO PRODUCTS» ឯកឧត្តម ឈរ ស៊ុនហុង អនុរដ្ឋលេខាធិការក្រសួងពាណិជ្ជកម្ម លើកទឹកចិត្តដល់ក្រុមហ៊ុនវិនិយោគ ធុរកិច្ច សហគ្រាសធុនតូចនិងមធ្យម ព្រមទាំងសហព័ន្ធស្វាយចន្ទីកម្ពុជានិងតួអង្គពាក់ព័ន្ធ ក្នុងការបន្តពង្រឹងគុណភាព ផលិតផលកសិផល ផលិតផលកសិ-ឧស្សាហកម្មកម្ពុជាប្រកបដោយស្មារតីទទួលខុសត្រូវខ្ពស់ ដោយត្រូវគិតគូរទាំងបរិមាណ គុណភាព សុវត្ថិភាព និងសោភ័ណភាពនៃការវេចខ្ចប់តាមស្ដង់ដាត្រឹមត្រូវ ដើម្បីរក្សាបាននូវកេរ្ដិ៍ឈ្មោះ កម្ពុជា និងនិរន្តរភាពនៃការនាំចេញ។

កម្មវិធីសម្ពោធជាផ្លូវការនេះ មានការចូលរួមពីឯកឧត្តម ឌ្រីសម៉ាន់ អ៊ីហ្គោរ៍ (DRIESMANS Igor) ឯកអគ្គរដ្ឋទូតសហភាពអឺរ៉ុប ប្រចាំកម្ពុជា និងឯកឧត្តម ដូមីនិក វីល្លៀម (DOMINIC Williams) ឯកអគ្គរាជទូតអង់គ្លេសប្រចាំកម្ពុជា ព្រមទាំងប្រធានសហព័ន្ធស្វាយចន្ទីកម្ពុជា នាយកប្រតិបត្តិក្រុមហ៊ុន អ៊ែមភលអាហ្គ្រោ ប្រដាក់ ឯ.ក៕